Kielsenip innuttaasunik 2016-imi ataatsimiititsineri naalakkersuisut.gl-imi

Naalakkersuisut Siulittaasuata Kim Kielsenip 2016-imi innuttaasunik ataatsimeeqateqarnerit 15-it ingerlassimavai nunatsinni illoqarfinni kiisalu Danmarkimi Savalimmiunilu. Ataatsimiititsinernit nassuiaatit naatsunnguit, sammineqartut innuttaasullu apeqqutaat naalakkersuisut.gl-imi atuarneqarsinnaalerput.

Naalakkersuisut Siulittaasuat Kim Kielsen ataatsimiinnerit pillugit oqarpoq:

”Naalakkersuisut Siulittaasuattut politikkikkut sulininni innuttaasut tikillugit naapinnissai qanorlu oqaasissaqarnerat  tusarnaarnissai pingaartippara. Ataatsimiinnerni, suliffeqarfinnut pulaarnerni inunnillu ataasiakkaanik oqaloqateqaraangama politikkikkut suleriaqqinnissannut isumassarsisinneqartarpunga. Naalakkersuisuni sulinitsinni innuttaasut ulluinnarni atugaat aallaavigalugu sulinissatta attannissaa pingaaruteqarpoq. Taamaammat innuttaasut sineriassuatsinniittut naapittarnissaat sapinngisannik ingerla­tiinnassavara Naalakkersuisut sulinerat oqaluttuarerusullugu kisiannili aamma innuttaasut inuiaqatigiit ineriartornerannut isumassarsiaat, kissaataat isumaallu tusarusullugit”.

Innuttaasunik ataatsimiititsinernit nassuiaatit uani atuakkit.

 

Paasisaqarnerorusuttut attavigisinnaavaat Naalakkersuisumut allatsi Karen Motzfeldt, oqarasuaat +299 34 50 00, oqarasuaat angallattagaq +299 56 24 50 imaluunniit e-mail karm@nanoq.gl.