Piniartut puisit amiinik tunisisartut 1,7 mio. koruuninik bonusisissapput

Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisup Vittus Qujaukitsup Naalakkersuisut decemberip 29-anni 2016-imi ataatsimiinneranni ilisimatitsissutigaa, piniartunut puisip amiinik Great Greenlandimut ukioq 2016-imi tunisaqarsimasunut tunisinermi tapisiaasa qaavisigut bonusiaqartinnissaanut ukioq 2016-imi aamma periarfissaqaqqittoq.

Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisup Vittus Qujaukitsup tassunga atatillugu nuannaarutiginerarpaa oqaarlunilu:,, "Nuannaarutigaara ukioq manna kingumut piniartunut ukiortaalernerani bonusisiaqartitsisinnaanermut, piniartuuneq kulturikkut kingornussatsinnut pingaaruteqarpoq, pingaartipparalu Naalakkersuisut qujaniarlutik tunisisartunut nersorinnissinnaammata."

Bonusisiassat 2016-imi katillugit 1,7 millionit koruuniupput, puisit amiinik tunisinermut tapiissutitut aningaasaliissutinit matussuserneqarput. Bonusisiassat 2015-imi bonusisiat annertoqatigikannerpaat.

Great Greenlandimit bonusisiassat agguaanneqassapput, piniartullu ataasiakkaat tunisartagaat naapertorlugit annertussusilerneqassapput. Ukiortaap kinguninnguatigut tunniunneqassapput.

Annertunerusumik paasisaqarusukkaanni attavissaq: Naalakkersuisoqarfimmi pisortaq Jørn Skov Nielsen, Inuussutissarsiornermut, Suliffeqarnermut, Niuernermut, Nukissiuuteqarnermullu Naalakkersuisoqarfik email: jsn@nanoq.gl, telefon +299 34 56 34.