2017-imi aprilip ulluisa sisamaanni qinersisoqassaaq

Qinersineq

Kommuunini kommunalbestyrelsissanik, Ilagillu sinniisaannut, Qaasuitsullu Kommuniani Ikaarsaariarnermut ataatsimiititaliassanut qinersinissat

Nunatsinni kommunini tamani kommunalbestyrelsimi – ilagiillu sinniisaannut – kiisalu aamma Qaasuitsup Kommuniani Ikaarsaariarnermut  ataatsimiititalianut ilaasortassanik 2017-imi aprilip ulluisa sisamaanni qinersisoqassaaq.

Kommunabestyrelsini allanilu ilaasortanngortussanik qinersisoqalerpat qinersisarnermi periaaserineqartussat pillugit maleruagassat nalinginnaasut malillugit qinersititsisoqassaaq.

Qinersisoqassatillugu pisarneq malillugu qinersisinnaatitaasut allakkatigut sioqqutsillutik qinersisinnaanissaminnut periarfissaqarumaarput, tamannalu januaarip aallartisimalernerani ullut nalinginnaasumik suliffiusut aallarteqqippata periarfissaalertussaavoq.

Kikkut qinersisinnaallutillu qinigassanngortissinnaanersut pillugit. Annertunerusumik paasisaqarusukkuit Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut Inatsisaat atuarsinnaavat.

Nalunaarutiginninnissamut killissaliunneqartoq

Kommunalbestyrelsinut aamma Ikaarsaariarnermut ataatsimiititalianut qinersinermut qinigassanngortittussat kingusinnerpaamik qinersinissaq sapaatit akunnerinik arfinilinnik sioqqullugu qinersinermik siulersuisunut nalunaarutigineqarsimasussaapput. Taamaattumik 2017-imi qinersisoqarnissaani qinigassanngortittussat kingusinnerpaamik marlunngornermi 2017-imi februarip 21-ani nalunaaqutaq 12:00 nalunaarutigineqareersimassapput.

Ilagiit sinniisaannut qinigassanngortittussat kingusinnerpaamik sapaatit akunnerini sisamani sioqqullugu marlunngornermi ulloq 7. marts 2017 mal. 12:00 nalunaarutigineqareersimassapput.

Kommunalbestyrelsinut aamma ilagiit sinniisaannut qinersinissat aammalu Qaasuitsup Kommuniani Ikaarsaariarnermut ataatsimiititalianut qinersinissat pillugit najoqqutassat sukumiinerusumik paasisaqarusukkuit itisiligaanerusumik allakkiaq una toorlugu atuarsinnaavat.

Aamma tusagassiorfinnut nalunaarummut atatillugu annertunerusumik paasisaqarusuttut Qinersinermut Ataatsimiitaliap allattoqarfianut immikkoortortaqarfimmi Pisortaq, Martha Abelsen attavigisinnaavaat, oqarasuaammut 34 51 11-mut sianerlutik imaluunniit e-maillikkut qinersineq@nanoq.gl  allaffigalugu attavigisinnaavaat.