2017-imut aalisagartassiissutit

Fiskefartoej Qalerallit qaleraleqarfinnut pisassiissutigineqartut ukioq mannatut amerlatigissapput

Naalakkersuisut aalisakkanut assigiinngitsunut aappaagumut pisassiissutit ullumi, decembarip 29-anni 2016-imi aalajangerpaat.

Qalerallit, sinerissap qanittuani
Naalakkersuisut aalajangerput aqutsiveqarfinnut Upernavimmut, Uummannamut aamma Qeqertarsuup Tunuanut 2017-imut qaleralittassiissutit ukioq mannatut amerlatigisut pisassiissutigineqassasut.
9.500 tonsit aqutsiveqarfinnut Upernavimmut aamma Uummannamut qaleralittassiissutigineqarput, 9.200 tonsit aqutsiveqarfik Qeqertarsuup Tunuanut.
Aqutsiveqarfinni Upernavimmi, Uummannami Qeqertarsuullu Tunuani sinerissamut qanittumi qaleralinniarnissamut biologit siunnersuutaat ukiunut marlunnut 2017-imut 2018-imullu atuuppoq.

Aqutsiveqarfimmut Qeqertarsuup Tunuanut 2017/2018-imi 6.400 tonsit pisarineqartussatut siunnersuutigineqarpoq, tassa 2015/16-imi siunnersuinermut sanilliullugu 1.600 tonsinik ikinnerullutik.

Aqutsiveqarfimmut Uummannamut biologit inassutigaat 2017/2018-imi 6.500 tonsinik pisassiisoqassasoq, 2015/16-imi siunnersuinermut sanilliullugu 500 tonsinik amerlanerussallutik.

Aqutsiveqarfimmut Upernavimmut 2017/18-imi annerpaamik 6.300 tonsinik pisassiisoqassasoq siunnersuutigineqarpoq, 2015/16-imi pisassiissutissatut siunnersuutigineqartut amerlaqataat.

Qalerallit, avataani

Biologit inassutigaat Davisstrædemi nunatta imartaani qalerallit 2017-imi 7.575 tonsit pisarineqarsinnaassasut. Qalerallit Canadap nunattalu aveqqissaassavaat, Davisstrædemi nunat taakku marluk namminneq imartaminni 7.575 tonsit aalisarsinnaassallugit.

Qimusseriarsuarmut biologit siunnersuutigaat 2017-imi nunatta imartaani 8.575 tonsinik pisassiisoqassasoq, 2016-imi 8.000 tonsinik pisassiinermut sanilliullugu pisassiissutit ilaneqarlutik.

Qalerallit 1.500 tonsit Naalakkersuisut 2014-imi pinngitsoorani tulaanneqartussaatitaat Maniitsumut suli tulaanneqartussaatitaassapput.

Saarulliit, sinerissap qanittuani

Sinerissap qanittuani aappagu saarullittassat pillugit Naalakkersuisut januaari aallartissimalerpat 2017-imi aalajangiiffigissavaat.

Saarulliit, avataani
Kitaani avataasiortut 2017-imi saarullinniarnissaannut biologit siunnersuutaat 2016-imi siunnersuutaannit allaannerunngilaq, tassalu saarullinniartoqassanngitsoq.
Tunumi saarulliit 7.930 tonsit pisassiissutigineqassasut biologinit inassutigineqarput. 2016-imut sanilliullugit amerlanerullutik.

Tamanna tunngavigalugu 2014-imi, 2015-imi, 2016-imi maannalu naatsorsuutigineqartutut 2017-imi aalisariutinut avataasiortunut saarulliit ukiumut 16.000 tonsit aalisarneqartassapput.

Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq Emanuel Rosing. Email: emanuel@nanoq.gl

Ilanngussaq