Piniarsinnaanermut allagartavit nutarternissaanut pisavit nalunaarutigineqarnissaat eqqaamajuk

Maannakkorpiaq sunngiffimmi piniarnermut allagartanit atuuttunit tamanit pisanik ukiumoortumik immersuiffissat immersoriikkat tiguneqareersullu 40 %-ii qarasaasiamut immiunneqareerput taamatullu inuussutissarsiutigalugu piniarsinnaanermut allagartanit attuuttunit tamanit immersuiffissat 80 %-ii immiunneqareerlutik. Sunngiffimmi piniarnermut allagartassat 1.800-ngajaat suliarineqareerput taamatullu inuussutissarsiutigalugu piniarnermut allagartassat 1.400-t suliarineqareerlutik.

Aalisarnermut, Piniarnermullu Naalakkersuisoqarfimmi (APN) piniarsinnaanermut allagartanik tunniussisarnerup killiffissiornerani ukiup nutaap aallartinngitsiarnerani inuussutissarsiutigalugu piniarnermut allagartanut ukiumoortumik immersuiffissat immersoriikkat tiguneqareersut tamarmik qarasaasiamut immiunneqareerput. Sunngiffimmi piniarnermut allagartanut ukiumoortumik immersuifissat immersoriikkat qarasaasiamut immiunneqarnissaat suli sulissutigineqarpoq tamannalu januarimi sapaatip akunnerani siullermi naammassissangatinneqarlutik.

Pisanik ukiumoortumik immersugassamik immersuinerup qarasaasiamullu immiunneqarnerup imminik nassatarisarpaa ukiumut aggersumut namminerisamik piniarsinnaanermut allagartassap nutarterneqarnera, tassa piniarnermut allagartaqarnissamut piumasaqaatinik suli naammassinnikkaanni.

Nammineq qanoq iliuuseqarsinnaavit?

Ajuusaarnaraluartumik suli inuppassuaqarpoq ukiumoortumik immersugassamik nassiussisimanngitsunik imaluunniit qarasaasiamut immiussisimanngitsunik tassanilu pineqarlutik sunngiffimmi piniarnermut allagartat 1.700-t missaanittut aamma inuussutissarsiutigalugu piniarnermut allagartat 400-t. Tassa imaappoq inuit amerlangaatsiartut, piniarnermut allagartassaminnik nassiussiffigineqassanngillat ukiumoortumik immersugassaat APN-imit tiguneqareersimatinnagit imaluunniit imminut sullissivimmi www.sullissivik.gl-imi immiutereersimatinnagit.

Imminut sullissinermut www.sullissivik.gl-imut iserlutit piniarnermut allagartassat sumut killinnersoq takusinnaavat:

  • Suliarineqareernersoq ’ taamaappat inuit nalunaarsorsimaffiat malillugu najugarisannut nassiunneqareersimassaaq.
  • Pisanik nalunaaruteqarneq amigaataanersoq ’ taamaappat pisatit qarasaasiamut immiukkukkit nutarterinissamullu kryds-iliiguit taava piniarnermut allagartassaq nutaaq APN-imi suliarineqassaaq kingornalu inuit nalunaarsorsimaffiat malillugu najugarisannut nassiunneqassalluni.
  • Inatsimmi piumasaqaatit tamakkerlugit naammassineritit ’ innuttaasut inatsimmi piumasaqaatinik naammassinninngitsutut nalunaarfigineqartartut sumiiffimmi sullissivimmukartassapput imaluunniit inuussutissarsiornermut siunnersortimut tassanilu akineqarsinnaassapput immikkullu akuersissuteqarnissamik qinnuteqarnissamut siunnersorneqarsinnaassallutik.
Paasissutissat sukumiinerusut pillugit attavigiuk: Immikkoortortami pisortaq Amalie Jessen, oqarasuaat: 34 53 04, email: amalie@nanoq.gl