Piniarnermut allagartat aalisarsinnaanermullu akuersissutit kommuninit isumagineqartalissapput

Piniarnermut allagartat tuniunneqartarneri aamma sinerissap qanittuani umiatsiaarsorluni aalisarsinnaanermut akuersissuteqartarneq tamakkulu nutarterneqartarneri februaarip aallaqqaataa 2017 aallarnerfigalugu kommuninit isumagineqartalissapput. Qinnuteqartullu qinnuteqaataat ingerlaannaq suliarineqartalissapput.

Piniarnermut allagartanik piniartut kommunerisami allaffiinut  februaarip aallaqqaataanit 2017 saaffiginnillutik piniartalissapput. Nunaqarfimmiullu nunaqarfimmi kommunip allaffianut saaffiginnillutik piniarnermut allagartamik imaluunniit umiatsiaararsorluni aalisarsinnaanermut akuersissummik pissarsiniartalissapput.

Aalisartut, piniartullu allagartanik nutarteriniartut imaluunniit qinnuteqarniartut, kommunerisami innuttaasunut sullissivinnut saaffginnittassapput, tassani sullineqarnissaq ingerlassammat.

Sullissineq pilertornerusoq - Sullissivik.gl -mi

Qarasaasiaq aqqutigalugu piniarnermut allagartamik sullissivik.gl-ikkut qinnuteqartoqarsinnaassaaq. Aalisarnermut Piniarnermullu Naalakkersuisoqarfimmiit, neriuutigineqarpoq Sullissivik.gl aqqutigalugu imminnut sullittartut ukiuni tulliuttuni malunnaatilimmik amerleriaateqarumaartut.

Sullissivik.gl aqqutigalugu imminnut sullittartut amerlanerulersikkusullugit piniarnermut allagartamik pissarsiniartarneq  Aalisarnermut Piniarnermullu Naalakkersuisoqarfimmiit aamma sullissivik.gl-imiit pisariinnerulersinniarneqarpoq.

Sullissivik.gl aqqutigalugu piniarnermut allagartamik qinnuteqartup piniarnermut allagartassani nammineerluni printersinnaanngussavaa – akilersimaneranullu uppernarsaammik takussutissaqaleruni atoriaannanngussallugu.

 

Aalisarsinnaanermut akuersissutit

Umiatsiaararsorlutik sinerissap qanittuani qaleralinniarnissamut, saarullinniarnissamut, nipisanniarnissamut kapisilinniarnissamullu akuersissuteqareersut, akuersissutip pigeriikkamik assinga ukiumi tulliuttumi atuuttussaq kommunerisaminnut saaffiginnillutik ingerlaannaq pisinnaalissavaat.

Qinnuteqartut akuersissummik ingerlaannaq tunineqarsinnaanngitsut immikkut ittumik akuerineqarnissaminnik ingerlaannaq qinnuteqarsinnaalissapput, taannalu kommunimiit erngerluni Aalisarnermut Piniarnermullu Naalakkersuisoqarfimmut nassiunneqartassaaq.

Sukumiinerusumik paasisaqarusuttut attavigisinnaavaat Aalisarnermut Piniarnermullu Naalakkersuisoqarfimmi imm. Pisortaq Pollas Lyberth oqarasuaat: 34 53 02 imaluunniit e-mailikkut: poly@nanoq.gl