Naqqiut

2017-imut suli saarullittassiisoqanngilaq

Ullup qeqqanut radioaviisimi oqaatigineqarpoq 2017-imut saarullittassiisoqareersoq.

- Ajuusaarutigalugu oqaatigissavara eqqunngilluinnartumik issuarneqarama, maannamummi aappagu saarullittassanik suli pisassiisoqanngilaq, Aalisarnermut Piniarnermullu Naalakkersuisoq, Hans Enoksen erseqqissaavoq.

KNR.gl-ilu allappoq: “Saarullittassiissutit aappaagumut biologit siunnersuutaanit pingasoriaammik amerlanerusussat pisassiissutigineqassasut, aalisarnermut piniarnermullu Hans Enoksen oqarpoq. “

- KNR.gl aviisi Atuagagdliutit issuarnerarlugu allakkaluarpoq, kukkussuteqarporli. Atugagdliutinit apersorneqarama oqarpunga aappaagumut saarullittassiissutit ilisimatuut inassutaanniit amerlanerungaatsiarumaartut.

- KNR.gl-ip kukkussutaa tassaavoq oqarnerarmanga aappaagumut saarullittassiissutit aalajangereersimagikka.

- Taamaaqqajanngilarmi.

- Kisimiillunga saarullittassiissutissat aalajangigassarinngilakka,  Naalakkersuisut tamanna aalajangigassarimmassuk. Tamannalu ulluni qaninnerni pisussaasoq erseqqissaassutigissavara, Aalisarnermut Piniarnermullu Naalakkersuisoq, Hans Enoksen erseqqissaavoq.

Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq Pollas Lyberth. E-mail: poly@nanoq.gl