Isumaginninnermut siunnersortinut isumaqatigiissutinut pitsanngorsaatit

Isumaginninnermut siunnersortitut ilinniarsimasut ikippallaarujussuit ullumikkut suliassaqarfimminni atorfeqarlutik suliffeqarput kommunillu isumaginninnermut siunnersortinik atorfinititsiniarnerminni annertuunik unammilligaqarput. Naak kommunini isumaginninnermut siunnersortinik ilinniarsimasunik amerlanerusunik pisariaqartitsisoqarluinnaraluartoq tamatumani minnerunngitsumik meeqqat inuusuttullu sumiginnarneqartut pillugit suliassaqarfiit suliassallu kivinneqarnissaat eqqarsaatigalugu. Pissutsit imminut assortuuttut unitsinneqarlutillu aaqqiissuteqarfigineqartariaqarput meerartatsinnut inuusuttortatsinnullu pissutsit pitsaanerusut qulakkiissagutsigit. Taamaammallu isumaginninnermut siunnersortinut isumaqatigiissut nutaap pingaaruteqarluinnartumik isumaginninnermut siunnersortit sulinerminni aammalu akissarsiaqartinneqarnermikkut pitsanngorsaavigineqarneri toqqammavissinneqarneri nuannaarutissaavortaaq.

Akissarsiat aalajangersimasuni toqqammaviusumik isumaqatigiissutip kingunerisaanik pitsanngoriaateqarfiussapput agguaqatigiisillugu qaammammut missingerlugu 28.600,-kr.-iniit 31.300,-kr.-inut akissarsiat qaffariaateqassallutik, tamatumani isumaginninnermik siunnersortit meeqqanut inuusuttunullu kommunip pisortaqarfiini sullissisuusut akissarsiarisai qaffaavigineqarlutik. Isumaginninnermik siunnersortit aqutsisuusut akissarsiat aalajangersimasuni agguaqatigiisillugu missingerlugu 33.000 kr.-iniit 38.000 kr.-inut akissarsiat qaffariaateqassapput. Pineqartunut tamanut isumaqatigiissutip ukiup siulliani atuutilertinnerani sunniuteqassaaq. Tamatumani qaavatigut ilanngullugit tapit nikerartut. 

Isumaginninnermut siunnersortinut isumaqatigiissutip nutaap isumaginninnermut siunnersortinut pisortaqarfinni sulianik ingerlatsiviusuniittunut pissutsinik pitsaaneroqisunik alloriarfiit siulliit ilaat pingaaruteqartoq maanna tiguneqarpoq. Kommunini isumaginnittoqarfinni inunnik isumaginnittunik qinnuteqartoqarnissamut sulilernissamullu malunniuteqarfiusumik kajuminnarnerulersitsinerit pingaaruteqartut maanna alloriarfigineqarput. Ilisimavarput nunatsinni inunnik isumaginnittutut ilinniarsimasut katillugit missingerlugu 280-iusut. Taaneqartunit ikittuinnaat pisortaqarfinni ilaqutariinnut pinaveersaartitsinermik suliassaqarneruffiusunik qulakkeerinninnissanik ingerlatsillutik sulipput.

Alloriarnerli taaneqartoq kisimi aqqutissaanngilaq. Kommunini suliassanik ingerlatsisuusut ullumernit pitsaanerujussuarmik ikorfartorneqartariaqarput. Isumaginninnermut Aqutsisoqarfissap nutaap aallarnisarneqarneratigut suliniutissat arlaqaqisut aqqutigalugit alloriarnerit tulliit tiguneqarlutillu ingerlanneqassapput, tamatumani suleriaatsit assigiissarneqarnissai, ilinniartitseqqittarnerit, ilisimasanik katersuivik qarasaasiakkut pitsaanerusumik avitseqatigiiffiusussaq, periusissanik periarfissaasunik ullumernit pitsaanerusumik takujuminarsaanissaq, minnerunngitsumillu ataavartumik qitiusoqarfimmit ilisimasaqartunit ikorfartorneqartuarnikkut ikiorsiinerit tamatumani qitisumit aqutsisoqarfimmi sulisut suliassanik ilisimasaqartunit ikorfartuinerit assigisaallu. 

”Meeqqat inuusuttullu sumiginnarneqartunut pissutsinik pitsanngorsaanissat suliarineqarnissaani iliuusissat piffissaq sivisooq atorlugu suliassat kivinniarneqassapput, suliassaqarfilli pineqartoq tamakkerlugu misissoqqissaarlugu suliarivarput iliuusissallu piareerpagut. Suliniutissarpassuit eqeersimaartumik piviusunngortinneqarlutik atuutsinneqalernissaat maanna tulliuppoq. Pingaaruteqaqisumillu alloriarfimmik taamasilluta ingerlariarfeqarpugut. Kommunini meeqqanut inuusuttunullu suliassaqarfiit ingerlallualeriarpata alloriarnerit tulliit tigusinnaalissavagut, tassalu isumaginnittoqarnikkut politikkikkut suliassaqarfik pinaveersaartitsinermik sammitinneqarnerulernerujussuulernissaa, tamatumanimi meeqqat inuusuttullu angerlarsimaffiup avataanut ullumikkut inissinneqartartut amerlavallaarujussuartut pinaveersimatinneqarnissaat,” Ilaqutariinnermut, Naligiisitaanermut Isumaginnittoqarfimmut Inatsisinillu Atortitsinermut Naalakkersuisoq Sara Olsvig oqarpoq.

Annerusumik paasissutissanik pissarsinissami attavigiuk Naalakkersuisup allattaa Sina M. Kristiansen e-mail una aqqutigalugu: nimk@nanoq.gl