Ukiumi pisassiiffiusumi 2017-imi qipoqqaat pisassiissutaasut nunap immikkoortuinut agguaanneqarneri

Kitaanut 2017-imi qipoqqartassiissutit tamakkerlutik 12 (10 + 2 2016-imi pisarinngitsuukkat ilanngullugit). Angallatit qipoqqarniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januari 1-ianiik decembarip 31-anut qipoqqarniarsinnapput.

Pisassiissutit agguaanneqarneri Aalisarnermut Piniarnermullu Naalakkersuisumit akuerineqarpoq.

Qipoqqartassiissutit:

Qaanaaq, Upernavik, Uummannaq, Qasigiannguit, Qeqertarsuaq aamma Nanortalik 1. januar 2017-imi akuerineqartunik tuukkartalinnik qamutililinnik angallateqanngillat, taamaattumik qipoqqaat taamaallaat Qeqertarsuup Tunuaniit kujammut pisarineqarsinnaapput.

Agguaassineq siornatigutulli ukiuni kingullerni pisaasartut agguaqatigiissinnerat tunnga­vigalugu aalajangersarneqarpoq. Tamatuma saniatigut annikitsumik allannguisoqatsiarpoq isorliunerusut kommunillu angisuunik angallataatikinnerusut inuussutissarsiutigalugulu piniartut amerlassusii tunngavigalugit. Agguaassineq uuma ataani takussutissami takuneqarsinnaavoq:

Qipoqqaat 2017

 

 

Kalaallit Nunaata Kitaani*

Pisat 2016

2017-imut pisassiissutit (2016)

Qaasuitsup

1

3 (3)

Qeqqata

0

3 (3)

Sermersooq

3

4 (4)

Kujalleq

0

2 (2)

* Qaanaaq, Upernavik, Uummannaq, Qasigiannguit, Qeqertarsuaq aamma Nanortalik 1. januar 2017-imi akuerisaallutik qamutilinnik tuukkartalinnik angallateqanngillat 

Kommunerujussuit nammineerlutik pisassiissutit sinnerinik agguaasseqqittarsinnaasut siunnersuutigineqarpoq, taamalu ullormik aalajangersimasumik piffissalerlugit pisaasut aqunneqarnissaat aammalu pisassiissutit paggatassiissutigineqannginnissaat, Namminersorlutillu Oqartussat ingerlaannartumik agguaasseqqinnermut tunngasunik piaartumik ilisimatittarnissaat piumasaralugu. Naalakkersuisoq kommunit ataasiakkaat akor­nanni agguaasseqqittarneq massakkutut tigummiinnassavaa.

Kalaallit Nunaanni angisuunik arfattassat Arfanniarnermut Ataatsimiititaliarsuup (IWC), pisassiissutinik aalajangiisartuusup, inassuteqarnera tunngavigalugu aalajangersorneqartarput. Ataatsimoortumik ukiunut 4-nut atuuttumik tikaagulliusaanik, arfivinnik, qipoqqarnik Kitaanilu tikaagullinnik aammalu Tunumi tikaagullinnik pisassiissut 2015-2018-imut atuuppoq. Tullianik IWC-mi ataatsimiinnissaq pilersaarutigineqarpoq oktoberimi 2018-imi. Ukioq pisassiiffiusoq naagaangat nalilersuineqartartussaavoq, nutaamik ukiumut tullermut pisassiinissamut inassuteqaateqartoqarsimappat pisassanillu qaangiisoortoqarsimanersoq misissorlugit.

Arfiviit tikaagulliillu pisassiissutit agguataarneri pillugit tusarniaasoqassaaq 2017-imi januarip qaammataata affaata siulliup ingerlanerani.

Piniarnissani piumasaqaatit (www.inatsisit.gl)

Arfernik angisuunik piniarneq ingerlanneqassaaq takuuk:

  • Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 12, 22. december 2014-imeersoq
  • Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.
Paasissutissat sukumiinerusut pissarsiarerusukkukkit attavigiuk: Immikkoortortaqarfimmi pisortaq Amalie Jessen, tlf: 34 53 04, e-mail: amalie@nanoq.gl