Ujarassiorit 2016-imi ajugaasutut akissarsisut

Akissarsiassat siulliannik akileraaruteqanngitsunik 55.000 koruuninik aningaasartalimmik akissarsitinneqartoq tassaavoq Bendt Josefsen, Kapisillit. Bendt Josefsen-ip ajugaasutut toqqarneqarneranut peqqutigaa ujarak gnejs-eq sulfid-italik Kapisillit kujataanni nassaarisimasani. Ujarak taanna kanngussassamik akoqarluarpoq, akugalugit kanngussak 3,17 %, siilvi ujaqqamut tonsimut 10,1 gram kiisalu kobolt tonsimut 814 gram. Nassaami kanngussap koboltillu ataatsimut akuunerat soqutiginaateqarpoq, taamatullu saffiugassat taakku akooqatigiinnerat Nuup eqqaata ujaraani pisoqarsuusuni piffissami Arkæikum-imeersuni naliginnaanngilaq.  Nunap sannaani nutaajunerusuni soorlu Afrikap qiterpasissuani kanngussaqarfimmi kanngussak koboltilu ataatsimut nassaassaapput.

Ajugaasut aappaat tassaavoq Frederikke Filemonsen, Aasiaat, toqqagaassutigalugu ujarak gnejs-eq molybæn-issamik akoqartoq Aasiaat kangianni Ujarattarfimmi nassaarisimasani.  Ujarak molybdæn-imik 0,43 %-imik rhenium-imillu tonsimut 0,73 gram-imik akoqarpoq. Aasiaat eqqaani molybdæn-eqarneranik ilisimasat annertunngillat. Molybdæn manngertumik sisaliornermi akugineqartarpoq. Rheniummilu saviminernut kissarnermut annertuumut akiuussinnaasunut akugineqartarpoq, soorlu timmisartut motooriisa atortuinut.

Ajugaasut pingajuisut toqqarneqartut marluk tamarmik immikkut koruuninik 10.000-inik akileraarutitaqanngitsunik akissarsisut:

  • William Umerineq, Kuummiut, Ikermi ujaqqamik killuutissamik sulfid-itaqarluartumik nassaartoq. Ujaqqap akoraa kobolt 0,33 %. Sumiiffiup ujarassiornikkut ilisimaneqarnera killeqarpoq, taamaattorli nassaap ilimanarsarpaa aatsitassarsiornikkut soqutiginaatilinnik aatsitassaqarsinnaasoq.
  • Sofie Larsen, Qeqertaq, ujarak saviminissamik Ilulissat avannaani Anap Nunaaneersumik nassaartoq. Ujaqqak saviminermik 37,8%-imik akoqarpoq. Nassaarfiup eqqaani saviminissaqarfiit ilisimaneqarput, nassaarineqartumiilli pisoqaanerupput. Nassaap ilimanarsarpaa saviminissaqarfiit ilisimaneqartunit, soorlu Itilliarsummiit, nunap sananeqaataani nutaajunerusuni nassaarineqarsinnaasut.

Ajugaasut sisamaat sisamat tamarmik immikkut 5.000 koruuninik akissarsisut:

  • Charlotte Hansen, Qasigiannguit, amfibolit-imik manngertornisumik nassaartoq. Ujaqqap akugaa kuulti tonsimut 0,25 gram. Ujarak qaarsumit  piigaavoq siornatigullu Qasigiannguani kuulteqarnera ilisimaneqanngilaq. Nassaalli tamanna ilimanarsarpaa.
  • Hans Pape, Tasiilaq, ujaqqamik amfibolit-imik ilmenit-sitalimmik nassaartoq. Ilmenit titanium-imik saviminermillu akoqarpoq, Hans Papellu nassaava saviminermik 33,3 %-imik titan-iummimillu 10 % sinnerlugu akoqarpoq. Nassaarfiup nunaata sananeqaataa annikitsumik ilisimaneqarpoq, ilmenit-eqarneranilli periarfissaqarnera nassaarisap ilimanarsarpaa.
  • Poul Alaufesen, Ikerasaarsuk, aligormik aappaluartumik (rosakvarts) pitsaasumik Innap qaavani Nassuttuup kujammut timaani nassaartoq. Aligoq aappaluartoq pinnersaasiarineqartarpoq, taamattaarlu kusassaatitut ”healing”-imullu ujaqqatut atorneqartarpoq. Aligoq aappaluartoq annikitsumik aatsitassarsiorluni akuersissuteqarluni aatsitassarsiortartut tunisassiassaattut piukkunnaateqarpoq.
  • Bendt Egede, Illorsuit, Igalikup kangiani labradoritsimik pinnersaasiarineqarsinnaasutut pitsaassusilimmik nassaartoq. Labradorit pinnersaasiassaavoq iikkallu ujarattaatut atorneqarsinnaalluni. Nassaaq Ujarassiorimmut nassiunneqartoq silillugu pinnersaatitut ulamaartuliassatut piukkunnaateqarpoq.

Ajugaasunik toqqaasut tassaapput Aatsitassanik Ikummatissanullu Naalakkersuisoqarfimmi aamma Danmarkip Kalaallillu Nunaata ujarassiornermik Misissuisoqarfianiit ujarassiortut aatsitassalerinermik ilisimasaqartut. Ujarassiorit tassaavoq Kalaallit Nunaanni najugaqartunik ujarassiornermik soqutigisalinnik unammisitsineq. Allakkerivinni tamaniit akeqanngitsumik ujaqqanik Ujarassiorimmut misissugassanik nassitsisoqarsinnaavoq. Ujarassiorit pillugu annerusumik nittartakkami www.ujarassiorit.gl -imi misissuisoqarsinnaavoq.

Ujarassiorit Aatsitassanut Ikummatissanullu Naalakkersuisoqarfimmiit ingerlanneqarlunilu aningaasalersorneqarpoq. Ujarassiorimmi akissarsisut akissarsiassaat aningaasaateqarfinnit suliffeqarfinniillu ukuninnga aningaaliiffigineqarput:

GrønlandsBANKEN-ip Inuussutissarsiornermut  Aningaasaateqarfia, FinnAust Mining Plc aamma Greenland Gas & Oil tamarmik immikkut akissarsiassanut 40.000 koruuninik aningaasaliipput.

 

Hudson Resources Inc. aamma North American Nickel Inc. tamarmik immikkut 10.000 koruuninik aningaasaliipput.

 

Aatsitassanut Ikummatissanullu Naalakkersuisoqarfiup aningaasaliisut qutsavigai, Ujarassiorip ingerlanneranut pingaaruteqarlutillu pinngitsoorneqarsinnaanngimmata.

 

 

Ujarassiorit ajugaasullu pillugit paasisaqarnerorusuttut saaffissaat: Geologi Jonas Petersen oqarasuaat: +299 34 65 49 imaluunniit e-mail: jpet@nanoq.gl