Air Greenlandimut kiffartuussinissamut isumaqatigiissut inissippoq

Ilisimatitsissutitut nalunaarutigineqarsinnaavoq, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiup aamma Air Greenlandip Qaanaaq eqqaanilu, Upernavik eqqaanilu, Uummannaq eqqaanilu, Tasiilaq eqqaanilu, Ittoqqortoormiiniit Nerlerit Inaannut qulimiguulimmik timmisartuussisarnermi, kiisalu Kalaallit Nunaata avannaata timmisartut suluusallit atorlugit sullinneqarnerani angallannermi suliassat pillugit kiffartuussinissamut isumaqatigiissut atsiorniarlugu isumaqatigiimmata. Taamaalilluni sullissinermut atugassarititaasut tamarmik inissinneqarput.

Tamatumunnga atatillugu Air Greenlandimit ilisimatitsissutigineqarpoq, ataasinngornermi 19. december 2016-imi bilitsinik tuniniaaneq aallartinneqareersinnaassasoq.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Martha Lund Olsen tamatumunnga atatillugu oqarpoq:

”Inissitassat kingulliit inissimmata nuannaarutigisorujussuuara, taamaalillunilu ukiut tulliuttut ataatsimut isigalugit, minnerunngitsumillu juullimut atatillugu angallannissaq immikkut eqqarsaatigalugu angallannissat toqqissisimasumik ingerlanneqarsinnaalerput. Periarfissaq manna iluatsillugu sullissisut tamaasa suliap pitsaalluinnartumik, torersumik pilersitsiviulluartumillu ingerlanneqarsimanera pillugu qutsavigerusuppakka.”

Naalakkersuisoq nangippoq:

”Kiisalu nuannaarutigaara tapiliussatut isumaqatigiissutit siulliit inissimmata, taamaalillunilu Kalaallit Nunaata kujataani ukiuunerani qulimiguulinnut isumalluutit amerlanerusut neqeroorutigineqarsinnaalerput. Pingaartumik Nanortalimmi angallannikkut pissutsit tapiliussanik isumaqatigiissusiornikkut sullinneqarneq annertuumik kivitsivigineqartussaavoq, Disko Line-miillu uannut ilisimatitsissutigineqarpoq, sapaatit akunnerata matuma aallartinneraniit qulimiguullit ilassutissaannut bilitsinik tuniniaasoqalereertussaasoq, taamatullu Nanortalimmut imaatigut angallassinerit immikkut ittumik ilaneqartussaallutik. Kiisalu sapaatit akunneranni matumani Qaqortup Narsarsuullu akornanni angallavimmi, kiisalu Qeqertarsuup Tunuani tamarmiusumi qulimiguulinnut bilitsit akikillineqarsinnaaleriissapput.”

Naalakkersuisoq naggasiivoq:

”Tapiliussatut isumaqatigiissutit kingulliit ulluni sapaatillu akunnerini qaninnerni inissinnissaat naatsorsuutigineqarpoq, tassanilu aamma kinguaattoornerni inissinneqartarnissaq nerisaqartinneqartarnissarlu, aammalu bilitsinut annaasanut taarsiiffigineqartarnissaq pillugu ilisimatitsisoqarumaarpoq.

Naggasiutigalugu sullissisut, suliami matumani suleqataasimasut – angallannermi suliassanik tunineqarsimasut tunineqarsimanngitsullu – tamaasa qutsavigeqqippakka. Peqataasut tamarmik angallannermi suliassatsinnut pisariusunut aaqqiiniarnitsinni ilisimasaminnik pilersitsiviulluartunik iluaqutaasunillu tapersiisimapput, tassalu ilisimasanik, suliassat inaarutaasumik aaqqiivigineqarnissaannut naleqqulluartunik. Tamatumunnga atatillugu ilisimatitsissutigissavara, inissitassat kingulliit maanna anguneqareersut tunngavigalugit neqerooruteqartut, angallannermi suliassanik tunineqarsimanngitsut itigartitsissutinik inaarutaasunik nassiussivigineqassammata.”

 

Tusagassiorfinnut nalunaarummut matumunnga atatillugu attaveqarfissanut paasissutissat: Naalakkersuisumut allattaagallartoq Elisabeth Fleischer, mobil. +299 56 41 11