Kujataani atuarfiit 2016-mi Klassit Pujortarfiunngitsumi ajugaapput

Kujataani atuarfiit 2016-mi Klassit Pujortarfiunngitsumi ajugaapput

Qaarmarsaaneq pitsaasoq takuneqarsinnaalluni, malugineqarsinnaalluni oqallinnermillu pilersitsilluni allannguisinnaasariaqarpoq. Ukioq manna Klassi Pujortarfiunngitsumi ajugaasut tamakku tamaasa angusimavaat pujortartarnermut pujortarfigineqartarnermullu akerliussutsimik takutitsinermik aaqqissuussigamik taamaaliornikkut illoqarfigisaminni nunalu tamakkerlugu eqqumaffigineqalersumik oqallinnermik pilersitsigamik.

Peqqissutsimut Naalakkersuisup Agathe Fontain 2016-mi Klassi Pujortarfiunngitsumi ajugaasut toqqarpai. Ajugaasutut akissarsiaq 30.000 kr.-inik aningaasartalik Tasersuup Atuarfiani 7.c.-nut Qaqortumiittunut tunniunneqarput normu 2-tullu toqqarneqarput Nanortallip Atuarfiani 7. a-nut taakkununngalu 15.000 kr.-inik akissarsiassaq tunniunneqarpoq.

- ”Atuartut suliassamik suliarinninnerminni periusaat pikkugeqaara. Klassit ajugaatinneqartut marluk suliassartik suliarigamikku najukkaminni innuttaasut peqataatissimavaat. Taakkua sammisat pingaarutillit sammisimavaat tassalu meeqqat akornanni pujortartarneq, pujortarfigineqartarneq meeqqallu pujortartannginnissaannut tupamillu pissarsisinnaannginnissaannut inersimasut akisussaasuunerat ilanngussimallugu,” Peqqissutsimut Naalakkersuisoq Agathe Fontain oqarpoq.

Qaqortoq-mi Tasersuup Atuarfiani 7.c. ajugaatinneqarput taakkulu pujortartarnermut akerliussutsimik takutitsinermik aaqqissuussillutillu innuttaasunik ataatsimiititsisimapput qulequtaralugu: ”Meeqqat pujortaqqusaanngillat”. Atuartut aamma nammineerlutik pujortartarneq pillugu misissuinermik ingerlatsisimapput inunnik 66-nik apersuisimallutik akissutigineqartullu atorlugit kisitsisit atorlugit nassuiaasiorsimallutik. Suliassamik suliarinerani klassip najukkami pitsaaliuinermut siunnersorti suleqatigisimavaat.

Nanortalimmi Nanortallip Atuarfiani 7.a., normu 2-tut toqqarneqarput. Klassip qaarmassaanerani angajoqqaat akisussaanerat ukkatarineqarpoq. Atuartut oqaluttualiorsimapput nammineerlutik allallutillu titartaasimallutik. Oqaluttualiami tusarliunneqartoq tassaavoq meeqqat pujortartassanngitsut inersimasullu maligassiuinermikkut meeqqat inuusuttullu pujortartalinnginnissaanik ikiussagaat. Oqaluttuami klassip oqaluttuaraa angajoqqaat ilaasa meeqqatik cigaretsinik tunisaraat. Atuaqatigiinnillu tamanna akerliuffiginiarneqarpoq.

Ukioq manna Klassi Pujortarfiunngitsumi sammisaq tassaavoq tupap pillugu oqaloqatigiinnissaq. Peqqissutsimut Naalakkersuisoqarfik qaarmarsaanissamut siunnersuutinik kusanartunik nutaanillu pilersitsiffiusunik amerlasuunik tigusaqarsimavoq. Unammisitsinermi katillugit klassit 12-it peqataasimapput. Ajugaasut qaarmarsaanermut atortussiaat aammalu Klassi Pujortarfiunngitsoq pillugu unammisitsineq annertunerusumik Peqqik.gl –mi atuarneqarsinnaapput.

Annertunerusumik pasissaqarniaraanni naalakkersuisup allattaa Nauja Møller attavigineqarsinnaavoq mobil: +299 58 26 54 imaluunniit e-mail: nmoe@nanoq.gl
atorlugit.