Citronen Fjord-imi suliassamut piiaanissamut akuersissut aamma VVM akuerineqarput

Ironbark A/S-ip Avatangiisinut sunniutaasussanut nalilersuinera (VVM) aamma piiaanissamut akuersissummut missingiut sisamanngormat ualikkut Naalakkersuisut akueraat.

Ullumi tallimanngorneq 16. december 2016 Nuummi nalliuttorsiorpalaartumik atsioqatigiinnermi Aatsitassanut Naalakkersuisup, Múte Bourup Egedep, Ironbark A/S-imi pisortaq, Australiamioq Jonathan Downes peqatigalugu piiaanissamut akuersissut atsiorpaa.

Piiaanissamut akuersissut
Piiaanissamut akuersissummi Ironbark A/S Kalaallit Nunaata avannaani Tasernermi sphalerite-nik (zinkinik ataannartunik aatsitassartaqartoq) aamma galena-nik (aqerlumik ataannartumik aatsitassartaqartoq) piiaanissamut kisermaassisussaatitaaffilerneqarpoq. Sumiiffik akuersissuteqarfiusoq 120 kvadratkilometerinik annertussuseqarpoq aammalu Nunami allanngutsaaliukkami Citronen Fjord-imi inissisimalluni.

Aatsitassanut Naalakkersuisoq oqarpoq:
”Naammagisimaartorujussuullugu piiaanissamut akuersissut, piiaanermik suliassaalersussamut patajaatsunik sinaakkusiisussaq, atsiorpara. Piiaanissamut akuersissut piiaanermik suliassamut pingaarnertigut sinaakkusiisuuvoq aammalu suliassap Kalaallit Nunaannut aammalu kalaallinut kinguaassatsinnut iluaqutaasumik suliarineqarnissaanut qulakkeereqataasussaalluni.”

Piiaanissamut akuersissutip atsiorneqarnerani suliassami aalajangiisuulluinnartumik pingaaruteqartoq malunnartinneqarpoq. Kisermaassisussaatitaalluni akuersissummi Ironbark A/S-ip ukiuni 30-ini sumiiffimmi akuersissuteqarfiusumi piiaanissamut kisermaassisussaatitaanissaa qulakkeerneqarpoq. Akuersissut ukiunut 50-nut sivitsorneqarsinnaavoq.

Piiaanissamut aamma matusinissamut pilersaarummik kiisalu ingerlatassanut pilersaarutinik suliaqarnissaq tullinnguuppoq. Pilersaarutit taakkua suliarineqarnerat ingerlatseqatigiiffiup aamma Naalakkersuisut akornanni qanimut suleqatigiinnikkut ingerlanneqassaaq. Piiaanissamut matusinissamullu pilersaarutip Naalakkersuisunit akuersissuteqarfigitinnissaanut ingerlatseqatigiiffik ukiumik ataatsimik piffissalerneqarpoq, taannalu ilaatigut isumannaallisaanermut avatangiisinullu apeqqutinut piumasaqaatinik sukumiinerusunik imaqassaaq.

Piiaanissamut akuersissut (tuluttut) atuarneqarsinnaavoq uani

Aatsitassanut Naalakkersuisup nalliuttorsiorpalaartumik atsioqatigiinnermi tuluttut oqaatigisai atuarneqarsinnaapput uani:

Kalaallisuunngorlugu nutserneqarnera

Avatangiisinut sunniutaasussanik nalilersuineq (VVM)

VVM-iata akuerineqarnerani suliap ingerlanera ukiorpassuarni ingerlasimasoq naammassineqarpoq. Avatangiisini misissuinerit siulliit 1994-imi aallartipput. Ironbark A/S suliap ingerlanerani, tusarniaalluni ataatsimiititsinertigut aamma allaganngorlugu tusarniaanermut akissuteqaatit aqqutigalugit, innuttaasunik aamma soqutigisaqaqatigiiffinnik oqaloqateqartarsimavoq. Tamanna VVM-imut nassuiaammik inaarutaasumik aamma itisiliiffiusumik nalunaarusiamik malitseqarpoq. Tassani ingerlatseqatigiiffiup oqaluttuaraa avatangiisinut sunniinernut qanoq isummersornerluni aammalu suliassamut atatillugu avatangiisinut ajoqusiisumik sunniinissat qanoq pinngitsoortinniarnerlugit.

Namminiilivinnermut, Pinngortitamut, Avatangiisinut Nunalerinermullu Naalakkersuisoq oqarpoq:
”Nunami allannguutsaaliukkami Citronen Fjord-imi suliassamut taamaattumut pissutsit immikkut illuinnartuunerat eqqumaffigisorujussuuarput. Taamaattumik ingerlatseqatigiiffiup piareersaanermik suliaqarsimanera aammalu akuerisinnaasatsinnik VVM-imut nassuiaammik aamma itisiliiffiusumik nalunaarusiamik saqqummiussinera, naammagisimaarparput. Taamaattoq suliaqarnermut suli naammassinngilluinnarpoq. Maannakkut pilersaarutit piviusunngortinneqartussanngorput. Tamanna avatangiisinut oqartussaasutut malinnaaffiginissaa qilanaaraarput.”   

Paasissutissanik annertunerusunik piniarnermi, attaveqarfigeqquneqarpoq:

Thomas Haugaard Pedersen, Aqutsisoqarfimmi pisortaagallartoq, Aatsitassanut Ikummatissanullu Aqutsisoqarfik, oqarasuaat 34 68 18, e-mail: thomash@nanoq.gl Najaaraq Demant-Poort, Aqutsisoqarfimmi pisortaq, Aatsitassanik Suliassaqarfinnut Avatangiisinut Aqutsisoqarfik, oqarasuaat 34 68 38, e-mail: nasd@nanoq.gl