Atorfillit Kattuffiata (AK) pisortallu isumaqatigiissutaat nutaaq

Atorfillit Kattuffiata (AK) aamma Namminersorlutik Oqartussat akornanni piffissamut 2015-2019-imut isumaqatigiissutinik nutarterinissaq pillugu isumaqatigiinniarnerit 30. november 2016-imi isumaqatigiinniartut angusanik atsiornerisigut naammassineqarput. Tamanna sioqqullugu AK-mut ilaasortat taasitinneqarnerisigut isumaqatigiinniarnerni angusat akuerineqarput. 

Isumaqatigiinniarnerni Isumaginninnermi siunnersortit akissarsiaqartitaanerat sammineqarsimaqaaq. Taamaalilluni suliaqaqatigiinnut taakkununnga sulinermi atugassarititaasut 2016-imi eqqumaffigineqarsimaqaat, ilaatigut meeqqanut atugarliortunullu allanut atugassarititaasut eqqumaffigineqarnerujussuat tunuliaqutaralugu. Isumaginninnermi siunnersortitut sulinerup nammagaqarnarnera akuersaarniarlugu suliaqaqatigiinnut taakkununngarpiaq sulisorinniinnarniarnerup pitsanngorsarneqarnissaanut immikkut tunngaviliisoqarpoq.  Tamatuma kinguneraa akissarsiat qaffasissusiisa isumaginninnermi siunnersortitut sulinermi akisussaanermut naapertuunnerulernerat. Aammattaaq siunissami pisut ilaanni isumaginninnermi siunnersortip sulinerani pingaartumik inatsisit ingerlatsinermut tunngasut naapertorlugit aalajangiisoqassatillugu oqartussaanermut tapinik tunniussisoqarsinnaassaaq. 

Isumaginninnermi siunnersortit sulinerminni atugaannik pitsanngorsaaneq, kiisalu isumaginninnermi sulianik suliarinninnerup pitsaanerulernissaa kissaatigineqarlunilu pisariaqarpoq. Aammattaaq tamatumunnga atatillugu peqatigitillugu oqaatigineqassaaq suliatigut taamatut pitsanngorsaanerit taama ittut akissarsianik pitsanngorsaanerinnakkut anguneqarneq ajormata. Aammattaaq siunissami oqartussaasut ingerlatsiviillu piginnaatinneqartut piginnaasanik qaffassaajuartarnissaq akisussaaffigissavaat, taamaalilluni sullissisut aalajangiineri pitsaaneruleqqullugit. Tamatumani ilaatigut sullissinerup akisussaassusermik suliamillu pingaartitsinermik ilaliiffiusumik qaffasissuseqarnissaanik qularnaariffiusumik pisariaqartumik aqutsisoqarlunilu ilitsersuisoqartariaqarpoq.

Suliaq tamanna siuarsarniarlugu immikkoortortamik, isumaginninnermi siunnersortinit, sullissisunit, kiisalu ilinniartitaanermut tunngasuni akisussaasunit peqataatitaqarfiusumik pilersitsisoqassaaq. Immikkoortortami tassani oqallinnermi ilaatigut ilinniartitseqqittarneq, najukkami sulinermi pissutsit attuumassuteqartut eqqartorneqartarnissaat kissaatigineqarpoq, sulliviup peqqinnartuunissaanik, isumaginninnermi suliatigut ilinniartitaanermik allanillu anguniagaqarneq naapertorlugu.

Isumaqatigiinniarnerni sammineqartut allat marluk tassaasimapput Klinikassistentit Nakorsallu allattaat, suliaqaqatigiinni taakkunani maanna sulisuusut sulisoriinnarneqarnissaat nutaanillu inuusunnerusunik kajumilersitsinissaq pisariaqartinneqarmat.

Qitiusumik ilinniarfinni sulisut atugaat aamma isumaqatigiinniarnernut ilaatinneqarsimapput. Suliassaqarfimmi pineqartumi sulinissap kajuminnarnerulersinneqarnissaa sivisuumik kissaataasimavoq.  Matumani susassaqartut piffissaq suliffiusoq pillugu nutaamik 1. august 2017-imi atuutilertussamik isumaqatigiissusiornissaq isumaqatigiissutigaat. Piffissaq suliffiusoq pillugu isumaqatigiissut nutaaq naapertorlugu ataatsimut isigalugu qaangiuttoornernut aningaasartuutit killilersimaarneqassapput tamatumunngalu peqatigitillugu tunngaviusumik akissarsiat taamatulli qaffanneqarlutik. Tamatumunnga peqatigitillugu tamatumuuna atuartitsisunik piginnaasalinnik sulisussarsiornerup siuarsarneqarnissaa naatsorsuutigineqarpoq.

AK-p isumaqatigiissutigisaani ukioq naallugu sulisut 800-pput Kommunit Namminersorlutik Oqartussallu suliffeqarfiutaanni siammarsimasut.  Isumaqatigiinniarnerit eqqissisimarpalaartumik kinguneqartussamillu pipput.

Sukumiinerusumik paasisaqarusukkuit allaffiup pisortaa André Guttesen attavigisinnaavat tlf. +299 34 64 36