Isumaginninnikkut nakkutilliineq

AG-mi ulloq 14. december 2016-imi saqqummersuimi "Kommunip atorfilittat ittuujuitsut aarlerigai" qulequtsiullugu allaaserisoqartqarpoq. Allaaserisami Qaasuitsup Kommuniata Isumaginninnermut, Ilaqutariinnermut, Naligiisitaanermut Inatsiseqarnermullu Naalakkersuisoqarfiup ataani nakkutilliinermik ingerlatsineq nassuiaatigaa.

Kommunit isumaginninnermik ingerlatsinermini malittarisassanik malinninneranik nakkutilliinerup Naalakkersuisoqarfimmit ingerlanneqarnera ukiorpassuarni ilisimaarineqareerpoq. 2001-imi Naalakkersuisut isumaginninnermut tunngasunik allaffissornikkut aqutsinermik pilersaarusiornermillu isumaginnittuunissamik pisussaaffeqarnerat isumaginninnerup aqunneqarnera aaqqissuunneqarneralu pillugit Inatsisartut peqqussutaanni erseqqissarneqarpoq.

Meeqqat taperserneqartarnerat pillugu Inatsisartut inatsisissaattut siunnersuummi kommunimi meeqqat inuuniarnermikkut atugarisaannik nakkutilliinissaannik kiisalu meeqqanik angerlarsimaffiup avataanut inissinneqartunik nakkutilliinissamik kommunit ingerlatsinissaat erseqqissarneqaannarpoq.

Taamattaaq ilaatigut meeqqanut inuusuttunullu immikkoortuni malittarisassanik kommunit ingerlatsinerannik allaffissornikkullu aqutsinerannik nakkutilliineq Naalakkersuisut suli nakkutigisassaraat. Suliassap "Takkutilliisoqatigiit"-nut inissillugulu sulianik ilisimasaqassuseq qaffassarniarlugu sulisut immikkoortumut ataatsimut katersornissaat Naalakkersuisut taamaallaat toqqarpaat.

Nakkutilliisut nammineersut 1. januar 2016-imi pilersinneqarput, ullumikkullu sulisut arfinillit kommunini nunaqarfinnilu immikkoortortanik nakkutilliipput kiisalu nunatsinni ulloq unnuarlu angerlarsimaffinnik tamanik nakkutilliisuullutik. Ukioq manna illoqarfinni aqqanilinni nunaqarfinnilu arfinilinni immikkoortortanik nakkutilliinerit ingerlanneqarput, ulloq unnuarlu angerlarsimaffiit 15-it nakkutilliilluni pulaarneqarlutik. Isumaginninnikkut immikkoortuni nakkutilliinerni ullorlu unnuarlu angerlarsimaffinnik nakkutilliinermi, oqaloqatiginninnermik aallaaveqartumik aaqqissuussinissaq, assigiiaartumik, attuumassuteqanngitsumik kiisalu sulianik piginnaasalinnik nakutilliinissaq malitseqartitsinissarlu siunertarineqarput.

Nakkutilliinerit tamarmi illuatungeriit imminut tatigeqatigiiffigisaannik ingerlanneqartarnerat, naammagittaalliutinillu tigusaqartoqarsimannginnera paasissutissiissutigineqassaaq. Akerlianilli nakkutilliisut nakkutilliillutik pulaartarnerat iluarisimaarneqartoq oqaatigineqartarpoq.

Nakkutilliisut kommunimeersuugaluarunik Naalakkersuisoqarfimmeeraluarunilluunniit tamarmik pisortat akisussaassuseqartut ataanni inissisimapput, pisortanilu sulisut allat assigalugit aqutsilluarnissamik periutsinik malinnittussaapput, uungalu tunngatillugu ammasumik, inussiarnersumik eqaatsumillu pissusilersortussaallutik. Tamatuma nassatarisaanik pisortani sulisut ittuujuitsumik pissusilersortussaatitaanngillat. Sulisoq taamatut pissusilersorpat, taava innuttaasutut pisortaniluunniit ingerlatsisusut atorfilittap pisortaanut sukkulluunniit naammagittaalliortoqarsinnaavoq.

Innuttaasut inatsisitigut illersugaanissaannik Inatsisartut kissaateqarnerat nakkutilliisut pingaarnertut suliassarigaat erseqqissaatigineqassaaq. Tassungalu tunngatillugu nakkutilliineq siunertaqartumik illuatunginik tamanik oqaloqatiginninneq atorlugu ingerlanneqartarnera tassunga atatillugu soorunami tunngavissaatinneqarpoq, tassungalu ilanngullugu aamma kommunip ingerlatsivianik.

Annertunerusumik paasisaqarusunnermi saaffigineqarsinnaavoq Helle Bonde (Ilaqutariinnermut, Naligiisitaanermut Inatsiseqarnermullu Naalakkersuisoqarfik - Departementet for Sociale Anliggender, Familie, Ligestilling og Justitsvæsen)
hbon@nanoq.gl