Millionilikkaanik sipaaruteqarneq

TELE-POST’imi Account Manageri Katrine Andersen aamma It’eqarnikkut ingerlatsinermut aqutsisoq Tony Ditlevsdal, Digitalimik Sullissinermut Aqutsisoqarfik. Assiliisoq: Helle Nørregaard, Namminersorlutik Oqartussat. 

 

Kalaallit Nunaanni databaseserveri annerpaaq maanna kommunenut aamma Namminersorlutik Oqartussanut millionilikkaanik sipaaruteqartitsisussaq piareerpoq. Ilutigitillugu databaseserveri pisortat ingerlatsiviini tamani aningaasaqarnikkut pitsaanerusumik aqutsinissap angujartuaarneqarnissaanut qulakkeerinnissutaassaaq. 

Sipaaruteqarnikkut ilunaarutissarujussuaq ukiumut 20 mio.-nik annertussuseqartussaavoq Kalaallit Nunaanni kommunit tamarmik aamma Namminersorlutik Oqartussat aningaasaqarnikkut systemimik nutaamik ERP’imik aningaasaleeqatigiinnerisigut.  Kommunit naalagaaffiullu akornanni suleqatigiinneq immikkorluinnaq ittuuvoq, suleqatigiissuteqarneq taamaattoq nunarsuarmi kisiartaasoq suliarineqarluni.

Ulloq 1. januaari 2018-imi Kommuneqarfik Sermersooq aamma Namminersorlutik Oqartussat ERP-systemip nutaap aallartinnissaanut piariissapput. Ukiup tamatuma tulliani kommunit sinneri aaqqiissummut nutaamut tassunga ilanngutissapput, Japanimeersup Fujitsup Danmarkimi immikkoortortaa tunniussisuussalluni.

Aamma nunamut immikkorluinnaq ittuuvoq Naalagaaffimmi kommunenilu aningaasatigut atugassanik ataatsimoorussamik atuineq, taamaaliornikkut pisortat atueriaasiat erseqqinnerujussuarmik takuneqarsinnaalissalluni. Tamatuma kingunerisaanik politikerit eqqornerusumik ataatsimut isiginnissinnaalerlutillu aalajangigassaminnik tulleriiaarilluarnerusinnaalissapput. Aamma innuttaasut ataasiakkaat suliffeqarfiillu pisortanut akiitsui pisariinnerusumik tamakkiisumik takuneqarsinnaalissapput.  

Aningaasaqarnikkut systemi taamaattoq, ullormut 2.000-nik atuisoqarfiusoq aamma ukiumut milliardilikkaanik nalilinnik nuussinernik suliaqarfiusoq, datamik annertuumik pisariaqartitsiffiuvoq. Siunertamut atugassamik dataserverimik, maannamut Kalaallit Nunaanni takuneqarsimanngisamik imaqqortussuseqarsinnaasumik, pissarsisoqaqqammerpoq. Databaseservererujussuaq taanna Telemi ikkussuunneqaqqammerpoq, programmillu nutaat ikkussuunneqarnissaannut piareerluni.

- Kalaallit Nunaanni databaseserverit annersaasa pingaarnersaasalu ilaat ERP’ilerinermi nutaami atorneqalissaaq. Tele Greenlanderpiaap suliassaqarfimmik ingerlatsinissaa isumaqarpoq siunissami atuisunut aalaakkaasumik ingerlatsinissaq qularutiginngilluinnariga, IT’eqarnikkut ingerlatsinermi aqutsisoq nuannaaqisoq, Tony Ditlevsdal, Digitalimik Sullissinermut Aqutsisoqarfimmeersoq oqarpoq.

Serverimik nutaamik ingerlatsisuunissamik toqqarneqarneq Telemit tulluusimaarutigineqarpoq.  

-TELE-POST’imit nuannaarutigisorujussuullugulu tulluusimaarutigaarput suliniummi matumani, kiisalu suliniutinut allanut tamanut tunngatillugu, Digitalimik Sullissinermut Aqutsisoqarfimmik pitsaasumik kinguneqarluartussamillu suleqatigiissuteqaratta, Account Manageri, Katrine Andersen, oqarpoq.

Pilersaarutit malillugit systemip atuisussanut siullernut ilinniartitsissutigineqarnissaa 2017-imi aasaanerani sulinngiffeqarneq killigalugu pissaaq, akiliinerillu nalunaarsorneqarnerat siulleq 2017-imi decembarimi pissalluni.

 

Paasissutissanik arlaqarnerusunik pissarsiniarlutit attaveqarfigiuk IT’eqarnikkut ingerlatsinermut aqutsisoq Tony Ditlevsdal oqarasuaammut angallattakkamut 55 58 12 imaluunniit mailimut todi@nanoq.gl.