Kangilinnguani saliisoqassaaq – atuisut kikkuugaluarpataluunniit

Danskit tusagassiorfiini atuarneqarsinnaavoq, kineserit ingerlatseqatigiiffiat Kangilinnguit pisiarinissaannut soqutiginnilluni saqqummiussisimasoq, tamannalu pissutigalugu Sakkutuut Kangilinnguaneeqqilernissaannut ammaanissaq aalajangiunneqartoq.

Kineserit ingerlatseqatigiiffiata saaffiginnissutaa Kangilinnguit sakkutuunut ammaateqqinneqarnissaannut tunngavilersuuteqarnermi aallavippiaasimappat – Illersornissamut Ministereqarfiup ilisimatitsissutigisaatut Illersornissamut Ministereqarfiup siunissami issittumi suliassaanik misissueqqissaarnera pinnani – tamanna isumakulunnarpoq. Taamaattoqarsimassappat pissutsit ilungersunarput. Nunarput pineqartillugu pingaaruteqarpoq paasissutissat tamakkiisut nunatsinnut saqqummiunneqartarnissaat taamaattumik maanna pisut paasissutissallu kingulliit pillugit atorfilittakka piumaffigaakka qulaajaanissamik siunertaqarlunga saaffiginneqqullugit”, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq.

Kineserit ingerlatseqatigiiffiannit soqutiginnittoqarnera pillugu Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik siusinnerusukkut ilisimatinneqarsimavoq, kisiannili Kangilinnguit ammaqqinnissaanut aalajangiinermut tamatuma sunniuteqarsimaneranik ilisimatinneqarsimanani. Naalakkersuisoqarfiup Illersornissamut Ministereqarfimmit Kangilinnguit ammaqqinneqarnissaanut siunissamut pilersaarutit pillugit annertunerusumik tusagaqarnissani utaqqivaa.

Illersornissamut Ministereqarfiup Kangilinnguani mingutsitsinernik saliinissaa Naalakkersuisunut pingaaruteqarpoq. Taamaattumik Illersornissamut Ministereqarfiup Kangilinnguit ammaqqissagaluarpassuk ammaqqissanngikkaluarpassulluunniit sukumiisumik saliisoqartariaqarpoq, Naalakkersuisoq Suka K. Frederiksen oqarpoq.

 

Paasisaqarnerorusuttut attavigisinnaavaat Karen Anne Arleth, Avatangiisinut Upalungaarsimanermullu Immikkoortortaqarfimmi pisortaq, Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik, oqarasuaat +299 34 54 65 imaluunniit e-mail knar@nanoq.gl, aamma attavigisinnaavat Naalakkersuisumut allatsi Naasunnguaq Olsen, oqarasuaat +299 34 54 14, mobil +299 52 36 84 imaluunniit e-mail nasu@nanoq.gl.