Aatsitassanut Ikummatissanullu Naalakkersuisoq aallarniutaasumik kommuuninut oqaloqateqarpoq

Aatsitassanut Ikummatissanullu Naalakkersuisup, Múte Bourup Egedep, aatsitassanut suliassaqarfimmi aallussinerulernissaq pillugu suliaqarnini, ilanngullugulu najukkani aatsitassarsiornermik suliaqartut oqaloqatiginissaat, nangeqqippaa. Marlunngorneq ulloq 6. december Kommuneqarfik Sermersuumi borgmesteri Asii Chemnitz Narup ataatsimeeqatigineqarpoq.

Aqaguani ulloq 7. december Aatsitassanut Ikummatissanullu Naalakkersuisup Kommune Kujallermi borgmesteri Jørgen Wæver Johansen ataatsimeeqatigaa, tassani ataatsimiinnermut uiggiullugu kommunimi inuussutissarsiortut arlallit aamma ataatsimeeqatigineqarlutik.

Ataatsimiinnerni marluusuni tamaginni, suliassat neriulluarnartut siuarsarnissaannik kommunip aamma Namminersorlutik Oqartussat aatsitassarsiornermik ataatsimoorlutik soqutigisaqarnerat oqallisigineqarpoq. Suliassat taakkua inuiaqatigiinnut kalaallinut minnerunngitsumillu najukkani innuttaasunut annertoorujussuarmik pingaaruteqarsinnaapput, tassami tamanna suliffissaqartitsinerulernermut kaaviiaartitaqarnerulernermullu iluaqutaasussaavoq. Naatsumik oqaatigalugu aatsitassarsiornermik suliassat Kalaallit Nunaanni inuiaqatigiit atugarissaartut peqqinnartumik siunissamullu qulakkeerisumik ingerlatiinnarnissaannut iluaqutaasussaapput.

Ataatsimiinnerni tamaginni ammasumik oqaloqatigiittoqarpoq, tamatumalu Aatsitassanut Naalakkersuisup ukiumi nutaami ingerlateqqinnissaa qilanaaraa. Naalakkersuisoq isumaqarpoq ammasuuneq oqaloqatigiinnerlu, siunissami suleqatigiinnissamut eqqortunik atugassaqartitsinissamut sakkussaasut pingaaruteqartut aammalu oqarpoq:

Kalaallit Nunaanni aatsitassarsiorfinni ingerlataqarnerni sulianik ingerlatitsisarneq pisariitsuinnaanngilaq, pissutigalugu najukkami innuttaasunut aamma avatangiisinut sunniinerit annertoorujussuusinnaammata. Aatsitassarsiorfinnut akuersinissaq pillugu aalajangernissamut, taakkua sunniutissaasa tamakkiisumik paasinarsisinneqarsimanissaat aammalu aalajangiisartut sunniinerusinnaasunut isummersorsimanissaat, pisariaqarpoq. Pitsaasuuppata aammalu pitsaasuunngippata. Taamatuttaaq aatsitassarsiorfimmi ingerlataqarnerit aallartissinnaanissaat sioqqullugu, suliap ingerlanera sivitsuloorsinnaavoq. Taamaattumik oqaloqatigiinneq aammalu ajornartorsiutinik ataatsimoorussamik paasinninneq, aaqqiivigeqataaffiginissaa uannut pingaaruteqartorujussuuvoq.

Ukiortaareerpat Naalakkersuisup, Múte Bourup Egedep, kommunit sinneri tikeraassavai.

Annertunerusunik paasissutissanik piniarnermi innersuussivigineqarpoq Aatsitassanut Ikummatissanullu Naalakkersuisoqarfimmi Naalakkersuisoqarfimmut pisortaagallartoq: Jørgen T. Hammeken-Holm, mobil 55 24 66, e-mail joeh@nanoq.gl