Atornerluinermi inuit pingaaruteqartut ikiuinissamut neqeroorutaapput

Atornerluineq pillugu inatsisissamut siunnersuut Naalakkersuisunit tusarniaatigineqarpoq. Suliffeqarfinnilu atornerluinermi inuit pingaaruteqartunik peqalernissaanut siunnersuut pillugu nutaarsiassatigut isornartorsiorneqarluni.

Inatsisissatut siunnersuummut oqaaseqaatini allassimavoq: ” Eqqarsaatigineqartoq tassaavoq atornerluinermi inuit pingaaruteqartut maluginiaassasut, kajumissaarissasut aamma katsorsaanermut innersuussisuussallutik.” Oqaaserlu maluginiaassasut immikkut maluginiarneqarluni isorineqarpoq, inunnut allanut pisariaqanngitsumik akulerunnertut isiginiarneqarluni.

“Isornartorsiuineq ilaatigut paasisinnaavara, eqqarsaatigaaralu siunnersuut naammassillugu nassiunneqartinnagu oqaaseqaatip allanngortinneqassasoq. Erseqqissaatigissavaralu atornerluinermi inunnik pingaaruteqartunik ilinniartitsinerup atornerluinermut pitsaaliuinermut suliffeqarfinni atornerluisunik katsorsaasarnermut ikiutaasarnissamut siunnersuisarnissamullu pisariaqartinneqartumut  nukittorsaataassammat,” taama oqarpoq Peqqissutsimut Naalakkersuisoq Agathe Fontain nangillunilu:

“Siunertaanngilaq atornerluinermi inuit pingaarutillit suleqatitik nakkutigissagaat. Inuillu pingaaruteqartut atornerluinermut ilisimasatik tunngavigalugit, suleqatertik atornerluisutut ersiuteqartoq saaffiginissaa toqqarsinnaavaa. Saaffiginninnerminnilu katsorsartinnissaq anguniarlugu tatiginartumik ataqqinnittumillu ikiuinissartik siunnersuinissartillu neqeroorutigisinnaavaat. Amerlasuunut katsorsartinnissamut aallartitsinissaanut pisariaqartitaanik kaammattuutaasinnaavoq.”

Sermitsiaq.AG-milu allaaserisat ilaanni saqqummersinneqarpoq, Peqqissutsimut Naalakkersuisuusimasup, Steen Lyngep atornerluinermi inuit pingaaruteqartut ilinnialernissaanut aningaasanik ujartuinissaq isornartorsioraa, aningaasaliissutaareermat.

Atornerluinermi inuit pingaarutillit ilinniagallit siulliit 2015 naammassipput. Kissaataavorli siunissami nuna tamakkerlugu atornerluinermi inuit pingaarutilinnik peqarnissaa. Taakkulu atuarfinni, meeqqanut paaqqinnittarfinni, peqqinnissaqarfinni, kommunillu ingerlatsiviini namminersortunilu sulisuusinnaapput. 

Pingaarutilittut atorfilik atornerluinernut assigiinngitsunut takunnissinnaasutut ilinniagaqarpoq, soorlu ikiaroornartumik, imigassamik aningaasanillu atornerluinernut. Saniatigullu taanna innuttaasunik atornerluisunut katsorsartinnissaanut kaammattuinissamut sungiusagaalluni. Katsorsaanermullu aaqqissuussinermut ilisimasaqarluarnerminut innuttaasumut aqqutissiuisuusinnaalluni.

 

Paasisaqarnerorusukkuit Naalakkersuisumut allatsi Nauja Møller oqarasuaammut: +299 58 26 54 imal. e-mailimut: nmoe@nanoq.gl attavigiuk.