Kiffartuussinissamut isumaqatigiissut aamma Aluu Airlines pillugit oqaaseqaat

Kommuninut, Nunaqarfinnut, Isorliunerusunut, Attaveqarnermut Ineqarnermullu Naalakkersuisoqarfik matumuuna Aluu Airlinesip ilaasunik angallassinermi kiffartuussinissamut isumaqatigiissutit neqerooruteqartitsivigineqarnerinut ilaanera pillugu tusagassiorfitsigut saqqummiussamut imaattumik oqaaseqaateqarpoq:

Aluu-mit aamma Bristow Groups-imit neqeroorutit tunniunneqartut pillugit suliap saqqummiunneqarneranut, tunuliaquttatut allakkiaq (linki ataaniittoq takuuk) naapertorlugu pissutsit matuma kinguliani saqqummiunneqartut arlallit, inuit tamat suliap ingerlaneranut paasinninnissaannut isumaqartussatut naliliiffigineqartut tapiliunneqartariaqarput. Tamanna tunngavigalugu Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfimmit innersuussutigineqassaaq, suliami saqqummiussat assigiinngitsunik, aammalu pissutsit matuma kinguliani allassimasut pillugit paasissutissat eqqunngitsut naapertuutinngitsullu ilumuunnginnerat uppernarsarneqarmat:

  • Aluu Airlines angallannermi suliassanut neqerooruteqartitsivigineqartunut neqerooruteqanngilaq. Aluu Airlines aamma Bristow Group ataatsimoorlutik, aammalu ateq Bristow Group atorlugu angallannermi suliassanut neqerooruteqarput. Taamaalilluni Aluu Airlines neqerooruteqarsimanngisaannarpoq.
  • Bristow Group Aluu Airlines suleqatigalugu, ateq Bristow Group atorlugu angallannermi suliassanut neqerooruteqarpoq.
  • Bristow Group-ip neqeroorutini utertippaa, tamatumalu kingorna neqeroorummik allamik saqqummiussinissamut periarfissinneqarnissaminik kissaateqarluni – tassani neqeroorut aningaasaqarnermut sinaakkusiussat sinningaatsiarpai.
  • Bristow Group aamma Aluu Airlines arlaleriarlutik Namminersorlutik Oqartussanut isumaqatiginninniarnernut peqataapput – tassalu ornigulluni ataatsimeeqatigiinnerit, taamatullu allakkatigut ingerlaavartumik attaveqaqatigiinnerit aqqutigalugit.
  • Bristow Group-ip sullissinissaanut nunap ataqatigiinnermut aaqqissuussaanerata sanaartugartaanik arlalippassuarnik iluarsiisoqarsinnaanera apeqqutaatinneqarpoq. Tunngavissat taakku piffissap ingerlanerani 1. januar 2017-imi ingerlatsinerup aallartinnissaa ajornarsiartortittussaagaat naliliisoqarpoq. Tunngavissani qulimiguulinnut mittarfiit nutarterneqarnissaat kiisalu hangarinik arlalinnik sanaartornissaq pineqarput, tamatumalu kingunerisaanik 1. januar 2017-imi pilersuinerup isumannaatsuunissaa ajornassasoq, kiisalu Namminersorlutik Oqartussat aningaasartuutit saniatigut sanaartornermut aningaasartuuteqangaatsiassasut qularnanngilluinnarpoq.

Tunuliaquttatut allakkiaq

Tusagassiorfinnut nalunaarut pillugu paasisaqarnerorusuttut uunga paasiniaasinnaapput: Kommuninut, Nunaqarfinnut, Isorliunerusunut Ineqarnermullu Naalakkersuisoqarfik, E-mail: isan@nanoq.gl