Kangerlussuup ukiuni 75-ni nalliuttorsiorneranut atatillugu innuttaasunut tunissuteqarput

Kangerlussuaq ukiuni 75-ni nalliuttorsiorneranut atatillugu Naalakkersuisut sinnerlugit Naalakkersuisoq Martha Lund Olsen Kangerlussuarmi innuttaasunut tunissuteqarpoq.

Naalakkersuisoq Martha Lund Olsen Kangerlussuarmi Nunaqarfimmi aqutsisut siulittaasuannut tunissummik tunniussinermut atatillugu oqaaseqarnermini ilaatigut imatut aallartippoq;”Naalakkersuisut pingaartitarivaat meeqqat ukiuannut atatillugu, meeqqat ullumikkorniit annertunerusumik ilaquttatik peqatigalugit sammisaqartarnissaasa periarfissaqalernissaat. Mannalu piffissaq eqqorlugu Kangerlussuup ukiuni 75-sinngortorsiorlugu nalliuttorsiutigineqarneranut atatillugu, Kangerlussuarmi pinnguartarfissamik pilersitsinissamik Naalakkersuisut aalajagersimapput”.

Pinnguartarfissaq meeqqat kisimik pinnguartarfissaattut pilersinneqassanngilaq, ilaqutariilli tamarmik ataatsimoorlutik atorsinnaasaannik pinnguartarfik ilusilersorneqassaaq. Meeqqanut inuusuttunullu pinnguarfiusinnaasunik aammalu inersimasunut utoqqasaanullu timigissarnermut atorsinnaasunik pinnguartarfik pilersinneqassaaq. Taamaasilluni ilaqutariit ataatsimoorlutik sammisaqarfigisinnaasaanik pilersitsisoqassalluni.

Naalakkersuisoq Martha Lund Olsen naggataatigut oqarpoq; ”Nuannaarutigalugu matumuuna pinnguartarfissap ilulisersorneqarnera titartaganngorlugu Kangerlussuarmi innuttaasunut tunniuppara, naatsorsuutigineqassaarlu aappaagu aasakkut pinnguartarfissap naammassineqarluni atorneqarsinnaalerneqarnissaa, Kangerlussuup ukiuni 75-nik ullorsiornerani tamassi pilluaritsi”


Saaffiginniffissaq, Naalakkersuisumut allataagallartoq Elisabeth Fleischer,  toqq 34 62 46, elif@nanoq.gl