Tanbreez Mining Greenland A/S-ip ataatsimeeqatigiinnerat

Aatsitassanut Naalakkersuisup aamma ingerlatseqatigiiffiup Tanbreez Mining Greenland A/S-ip ataatsimeeqatigiinnerat

Aatsitassanut Naalakkersuisunngortoq, Múte B. Egede, aatsitassanut suliassaqarfimmi pissutsinik pitsanngorsaanissaq aallullugu, naalakkersuinikkut sulinini aallartippaa. Tassunga tunngatillugu maannakkut suliniutaasut ilaat tassaavoq, aatsitassanut suliassaqarfiup iluani pissutsinik pitsaanerulersinneqarsinnaasunik peqarnersoq tusarniarlugu, suliassaqarfimmi suliaqartuusut naapinnissaat.

Tassunga atatillugu Naalakkersuisup aamma ilaatigut ingerlatseqatigiiffik Tanbreez Mining Greenland A/S ataatsimeeqatigaa. Tanbreez Mining Greenland A/S-ip qinnuteqaataa siusinnerusukkut itigartinneqarpoq, kisianni tamatuma kingorna ingerlatseqatigiiffiup qinnuteqaammi allakkiani suut qanorlu nutartersinnaanerai ilitsersuinermut atatillugu, Aatsitassanut oqartussaasoq qanimut oqaloqatigalugu aallartissimalluni. 

Ataatsimeeqatigiinneq pilersitsiviulluartumik ingerlanneqarpoq, tassani Naalakkersuisoq Tanbreez-ip qinnuteqaateqarnerani suliap ingerlanerata killiffianik paasitinneqarluni. Aammattaaq siunissami pisussanut, Aatsitassanut oqartussaasup allaffissornikkut aqutsinerminik inatsisinillu pisariinnerulersitsiniarluni ilungersuuteqarnerani erseqqinnerusumik nalilersorneqarsinnaasunut, isumassarsiat periarfissallu oqaloqatigiissutigineqarput.

Suliassaq taanna Kalaallit Nunaannut pingaartumillu Kujataanut pingaaruteqartoq Naalakkersuisup, Múte B. Egedep qularutiginngilaa, tassami taanna suliffissanik aammalu nunap immikkoortuani siuariartortitsinermik pilersitsisussaavoq. Tanbreez Kujataani ”Killavaat Alannguat” aatsitassanik qaqutigoortunik piiaanissamik kissaateqarpoq. 

Aatsitassanut Naalakkersuisoq Tanbreez-ip ataatsimeeqatigereernerata kingorna oqarpoq:

Tanbreez Kujataani aatsitassarsiorfimmut suliniutaavoq neriulluarnartoq. Taamaattumik ataatsimoorluni aqqutissamiittut ujaqqat kingulliit piiassagivut, Naalakkersuisut aamma Tanbreez isumaqatigiipput, taamaalilluta aatsitassarsiorfiup pilersinneqarnissaa piviusunngortinneqarsinnaassammat. Suliassap siumut ingerlanissaata qulakkeernissaa Naalakkersuisunut aalajangiisuulluinnarpoq, tassami tamanna najukkami suliffissanik siuariartortitsinermillu pilersitsisussaavoq. Illuatungaanit isigalugu aatsitassarsiorfinnut suliassat pisariusut taamaattut tamakkiisumik tunngaveqartumik isummerfigineqartassasut, Naalakkersuisut piumasaqaatigaat. Pissutsit arlalippassuit sammivinnut taakkununnga tamaginnut sammisinnaapput, taamaattumillu pissutsit taakkua tamarmik pitsaasumik paasinarsisinneqarsimanissaat Naalakkersuisut pingaartippaat. ” 

Taamaattumik Tanbreez-ip qinnuteqaammut allakkianik nutartikkanik tamaginnik nassiussinissaanut Aatsitassanut Naalakkersuisoq, Múte B. Egede, qilanaarpoq. Tamatuma suliassaq alloriarteqqittussaavaa, qinnuteqaammut nutartikkamut Naalakkersuisut isummersinnaanissaat qaninnerulersillugu.


Annertunerusunik paasissutissanik piniarnermi innersuussivigineqarpoq Aatsitassanut Ikummatissanullu Naalakkersuisoqarfimmi Naalakkersuisoqarfimmut pisortaq: Jørgen T. Hammeken-Holm, mobil 55 24 66, e-mail joeh@nanoq.gl,