Issittup imartaani ataatsimut aqutseqatigiinnissaq ukkatarineqarpoq

Issittup imartaani siunissami aalisalersinnaanissaq pillugu atorfilittanit isumaqatiginninniutigineqarmat isumaqatigiissutigineqarpoq issittup imartaani maannakkut aalisalersinnaanissamut periarfissaqanngitsoq, issittup imartaa sikooqimmat annerusumillu ilisimasaqarfigineqanngimmat.

Silalli pissussaata allanngoriartornerata sunniutigiumaagassaanut sulissuteqarnissamut pissutissaqarpoq.
Savalimmiuni novembarip 29-annit decembarip aappaannut isumaqatiginninniartoqarpoq.

Nunat ataatsimeeqataasut tassaapput USA, Rusland, Sydkorea, Norge, Japan, Island, Kalaallit Nunaat, Savalimmiut, Kina, Canada aamma EU-mit aallartitat.

Oslomi 2015-imi isumaqatigiissutaasimasoq tunngavigalugu naalagaaffinnit sinerialinnit tallimaasunit issittup imartaa pillugu isumaqatigiittoqarpoq.

Ataatsimiinnermi isumaqatigiissutissatut siunnersuut Whasingtonimi aamma Iqalunni ataatsimiinnerni inerisarneqarsimasoq oqaluuserineqarpoq.

Isumaqatigiissutissatut siunnersuummi ilisimatuussutikkut misissuinissamik periarfissiisoqarnissaa ilanngunneqarpoq, misileraalluni aalisarneq suleqatigiinnissamullu tunngavissat, issittup imartaani nakkutigineqanngitsumik siunissami aalisartoqartannginnissaa qulakkeerinninniarluni.

Ataatsimeeqataasut oqaluuserisaq akuersaarpalaartumik oqaluuseraat, isumaqatigiissutaasussaq naammassineqajalluni. Ataatsimiinneq USA-p aallartitaanit aqunneqarpoq.

Ataatsimeeqataasut ataatsimiinnertik naammassivaat qanittukkut isumaqatigiissusiorsinnaanissartik naatsorsuutigalugu. Ataatsimiinneq tulleq Islandimi 2017-imi pissaaq. Ataatsimiinnermi aqutsisoq siulittaasup nalunaarutaanik allagaqarpoq, allagaalu uani atuarneqarsinnaavoq.

Ataatsimiinnermi Kalaallit Nunaat Aalisarnermut aamma Piniarnermut Naalakkersuisoqarfimmit sinniisoqartitsivoq, Nunanut Allanut pisortaqarfimmit aamma ICC, Inuit Circumpolar Council. Danmark

Nunanut Allanut ministeriaqarfia peqataatitsivoq aamma Savalimmiut Nunanut Allanut ministeriaqarfia, Inuussutissarsiornermut ministeriaqarfia aamma Aalisarnermut ministeriaqarfia.

Attavigineqarsinnaavoq: Birgitte Jacobsen, Aalisarnermut Piniarnermullu Naalakkersuisoqarfik, tlf.: 548901 imaluunniit 345346