FN-ip nunarsuaq tamakkerlugu inunnut innarluutilinnut ullorititaa

Ulloq 3. december 2016 FN-ip inunnut innarluutilinnut nunarsuaq tamakkerlugu ullorititaraa. Nunarsuatsinni inuit 1 milliartit sinnerlugit amerlassusillit arlaatigut innarluuteqarput, tassa nunarsuup innuttaasa 15 %-ii.

Naalakkersuisooqatigiinnissamut isumaqatigiissummi 2016-2018-imi naalakkersuisut innarluutilinnut tunngasut pingaarnerulersippaat nutaamillu inatsiseqalernissaq aallutissallugu. Tassani FN-ip inunnut innarluutilinnut pisinnaatitaaffiit pillugit isumaqatigiissutaa qitiutinneqassaaq. Taamattaarlu sullissinermut isumassuinermullu tunngasut, suliffeqarneq, ilinniartitaaneq kiisalu ornikkuminassutsit pingaartinneqarput. Kingullertut taaneqartoq isumaqatigiissummi pingaarnerpaat ilagaat.

Isumaqatigiissutikkut tassuunakkut nunarsuaq tamakkerlugu innarluutilinnut tunngasuni maligassiuineq nutaaq atulersinneqarpoq. Inuit innarluutillit innarluutaat aallaavigalugu isigineqartarunnaassapput, akerlianilli innarluutigisaq inuup innarluutillip aalajangersimasup inuiaqatigiillu naapinneranni aporfiusartut aallaavigalugit isigineqartassalluni.

Naalakkersuisoq Sara Olsvig ilassusiilluni oqarpoq: ”Inunnut innarluutilinnut tunngasut sungiusimasatsinniit allaanerusumik oqaatigisassavavut. Qanga "innarluutilinnik" taagorpavut. Innuttaaqativut innarluutillit "innuttatut inuttulluunniit innarluutilittut" taagorlugit isiginneriaatsitta allanngortinnissaata pingaaruteqarnera erseqqissarumavara. Inuk pineqartoq sumilluunniit innarluuteqarnera apeqqutaatinnagu tamatta inuttut isigineqartariaqarpugut”.

”Nappaatip suunera innarluutigisalluunniit assigiinnera apeqqutaatinnagu, innuttaasut innarluutillit assigiinngisitaartutut assigiinngitsunik pisariaqartitsisutut isiginissaat pingaartuuvoq. Matumanimi inuup inuttut qiviarnissaa pivarput”.

Ukioq 2017 ukiuussaaq innarluuteqarnermut tunngasuni pitsaassutsimik qaffaaviussaaq. Nuna tamakkerlugu inunnut innarluutilinnut sullissivik ammarneqassaaq, inuit innarluutillit pillugit inatsisissatut siunnersuut Inatsisartut 2017-imi ukiakkut ataatsimiinneranni saqqummiunneqartussatut naatsorsuutaavoq kiisalu inuit innarluutillit oqaaseqartartuanik pilersitsisoqassaaq.

Ukioq manna FN-ip Ataatsimeersuarnermini inuit innarluutillit pisinnaatitaaffii pillugit FN-ip isumaqatigiissutaa ukiunik qulinngortorsiornera nalliuttorsiutigineqassaaq. Inuit innarluutillit inuit pisinnaatitaafiinik illersugaanissaat allatullu kiffaanngissuseqarnermut tunngaviusumik pisinnaatitaaffinnik atuisinnaanerat kiisalu taakku pinngortitaassutsimikkut ataqqineqarnerisa siuarsarnissaanik isumaqatigiissut qularnaarinnittuuvoq.

Isumaqatigiissutillu nunarsuarmioqatigiit isumaqatigiissutaasa akornanni qaqutigoortumik sukkasuumik naalagaaffinnillu amerlanernit atuutilersinneqarnera immikkoorutigaa. Ullumikkut nunat 147-t isumaqatigiissut atortussanngortereerpaat. Kalaalit Nunatsinnilu 2009-mili atuuppoq.

Paasissutissat erseqqinnerusut pillugit immikkoortortami pisortaq Kirsten Olesen maili kiol@nanoq.gl oqarasuaatilluunniit normua 34 66 57 atorlugu attavigineqarsinnaavoq.