Borgmesteri Jørgen Wæver Johansen-imut allagaq ammasoq

Kommuninut, Nunaqarfinnut, Isorliunerusunut, Attaveqaqatigiinnermut ineqarnermullu Naalakkersuisup, Martha Lund Olsen-ip borgmesterip Jørgen Wæver Johansen-ip amasumik allagaanut 2016-imi novembarip 23-aneersunut akissuteqaataa

Asasara Jørgen Wæver Johansen

Allakkannut ammasunut 23. november 2016-imeersunut qujanaq, tassanilu kiffartuussinissamut isumaqatigiissutaareersut ingerlanerat eqqartorpat.

Tapiliussatut isumaqatigiissutit aammalu bilitsinut annaasanut, inissinneqarnermut nerisaqarnermullu isumannaarinissamut najoqqutassaalertussaq atorlugit aaqqiissutissamik, kiffartuussinissamut isumaqatigiissutaareersuni ajornartorsiutit sinneruttut maanna iluarsineqarsinnaalernissaannut naammaginartumik nassaartoqartoq Naalakkersuisut isumaqarluinnarput. Aningaasanut inatsisissap pingajussaanneerneqarnerani aningaasanut inatsimmi innuttaasut ernumassuteqarfigisaannik naammassinninnissamut aningaasaliinissamut tunngavissamik qulakkeerisoqarnissaanut politikkikkut piumassuseqartoqartoq takutinneqarpoq. 

Angallasseriaatsit marluiusut aammalu tapiliussatut isumaqatigiissutit atorlugit pitsannguinerit arlallit atuutsinneqalernerisigut maanna innuttaasut toqqissillutik 1. januar 2017 aallarnerfigalugu Kalaallit Nunaata kujataanut, kujataaniit kujataanilu angalasinnaalertussaapput.

3. november 2016-imi Kommune Kujallermut tikeraarnera tunngavigalugu Naalakkersuisut Kommune Kujallermi kissaatit piviuisunngortinneqarnissaannik suliat, taakkulu suliniutinut aalajangersimasunut, tapiliussatut isumaqatigiissutit atorlugit piviusunngortinneqarnissaannut suliniutigineqarnerat ingerlateqqippaat. Tassalu Kommune Kujallermi innuttaasunut ilisimatitsissuteqarnera naapertorluinnarlugu.. 

Aamma isumaqarluinnarpunga suliassaqarfiit ilaanni angalariaatsit marluiit tapiliussatullu isumaqatigiissutit atuutilernerisigut ilaasunik angallassinerup pitsaassusia maannamit qaffasinnerulissasoq. Tamanna tunngavigalugu Kalaallit Nunaata kujataani angallannerup ataqatigiinnissaannut angusat pitsaasutut isigaakka.

Periarfissaq manna iluatsillu Kommune Kujallermi paasinninnermi suliamillu matuminnga saqqummiussinermi paatsoornertut suli isikkoqartut marlussuit nassuiaateqarfigilaassavakka. 

Pisuni arlalinni erseqqissaatigisarpara, kiffartuussinissamut isumaqatigiissutit isumaqatigiissutiginiarneqarnerini sukkulluunniit naligiissitsinissamut uniuuttutut isikkoqartutut Naalakkersuisunit isigineqarsinnaanngimmat. Akerlianik suliami naammassineqartumi sullissisut assigiinngitsut aaqqiissutissanik, ullumikkut ilisimasatsinnit allaanerusunik neqerooruteqarnissamut assigiimmik periarfissinneqarsimapput. Sullissisut sullissinerit ilaanni pilersuisoqarnissamut isumaqatigiissusiorsinnaaneq namminneerlutik aalajangiisinnaanerat taakkununnga ilaatinneqarpoq.

Aamma ilisimasattut Naalakkersuisut aningaasanut sinaakkutissanik ataatsimoortunik tunineqarsimapput, taakkulu iluanni nuna tamakkerlugu kissaatit tamarmiusut naatsorsuutigisallu tamarmiusut naammassiniarneqarnerat unammilligassaasimavoq. 

Oqareernittut isumaqarpunga, taamaakkaluartoq suliap inernerani tamarmiusumi anguneqarsinnaasut pitsaanersaat angusimavarput. Tamatumunnga atatillugu ilisimatitsissutigisinnaavara, isumaqatigiissutaasunut akit tamarmiusut, saniatigut pisiassanut isumaqatigiissusiornerit ilanngullugit, neqerooruteqartunut unammillertunut naleqqiullugu qinigassaq akikinnerpaaq angusimallutigu.

Qinigassanit ajugaatinneqartut, Air Greenlandip, Disko Linep aamma Norlandair-ip angallannermi suliassanik neqerooruteqartitsivigineqartunik isumaginniffigisassaat Namminersorlutik Oqartussanut neqeroorutaapput ataatsimut isigalugit aningaasaqarnikkut iluanaarnarnerpaat. Tassalu neqeroorutit ajugaatinneqartut ataatsimoortut, tapiliussatut isumaqatigiissutissatut pilersaarutinik ilaqartinneqarunik ilaqartinneqanngikkaluarunilluunniit, ataatsimut isigalugit naliliinissamut tunngavissat sisamaasut atorlugit naliliinermi aaqqiissutissaapput iluanaarnarnerpaat. 

Tassalu tapiliussatut isumaqatigiissutissatut pilersaarutit isumaqatigiissutigineqarnerat naliliinermik nikisitsissasut paatsoorneruvoq, saniatigut pisiassatut pilersaarutaasut pitsaassutsimik qaffaanermik kinguneqartussatut naliliiffigineqarmata. Assersuutigalugu oqaatigineqarsinnaavoq, tunngavissap akikinnerpaap ajugaatinneqartup, saniatigut pisiassat ilanngullugit akia, aammalu tunngavissap akikinnerup tullia, sullissisunik allanik akuleruussivigineqarluni akia suli assigiinngingaatsiarmata.

Kisiannili aaqqiissutissat kattullutik maanna aaqqiissutaasumit akisunerulermata ilumoorpoq. Taamaakkaluartoq erseqqissassallugu pingaaruteqarpoq, neqeroorutit kattunneqartut arlaalluunniit – ajugaasup saniatigut – sinaakkusiussat iluanni imaluunniit  sinaakkusiussat 2016-imi atuutsinneqartut iluanni akilerneqarsinnaanngimmata. Tunngavissat allanngortinnagit ingerlatsiinnarnermi, tassalu maanna sullissisuusut ullumikkutut suliassanik ingerlatsiinnarluni ajugaasimasuuppat, tamanna ukiumut 10 mio. koruunit missaannik akisunerusimassagaluarpoq. Tamatumani atortunik nutaanik taarsiinikkut, pisinnaasat annertusinerisigut, piffissamik eqquisarnerup annertusineratigut allatigulluunniit pitsaassutsimik qaffatsitsinermik pitsannguisoqarani. Kiisalu oqaatigineqarsinnaavoq, Bristow Group neqeroorutertik inaarutaasoq iluarsisarlu atorlugu ajugaasimasuuppat, ukiumut aningaasartuutit 6 mio. koruunit missaannik amerlanerunerisa saniatigut Namminersorlutik Oqartussat nunatsinni qulimiguulinnut mittarfiit 23-t missaanniittut piorsarnerinut allinerinullu aningaasartuuteqangaatsiartussaagaluarmata. Tassalu piorsaanissaq, sanaartornermut aningaasartuutinik amerlasuunik akeqarnermi saniatigut angallannermi sullissinerup 1. januar 2017-imi toqqissisimanartumik aallartinneqarnissaanut piffissaagallartillugu qulakkeerivigineqarsinnaanngitsoq.

Tunngavissamut ajugaasumut saniatigut pisiassatut pilersaarutaasut atorlugit angallannermi sullissinermut maanna atuuttumut aammalu tunngavissamut ajugaatinneqartumut naleqqiullugit pitsannguinerit annertuut arlaliussapput. Tassalu tunngavissaq ajugaasoq, pitsaassutsimut ullumikkut neqeroorutigineqartumut sanilliullugu annertunerusunik arlalinnik pitsannguuteqarpoq. Assersuutigalugu Kalaallit Nunaanni angallasseriaatsit marluiit, piffissamik eqquisarnermik pitsaanerulersitsisussat, qulimiguulimmut sanilliullugu akikinnerusunik qinigassaqartitsiviusut, Qeqertarsuup Tunuani qulimiguullip pisinnaasai annertunerusut, Qeqertarsuup Tunuani bilitsit 30%-inik akikinnerusut (mittarfinnut akitsuutit ilanngunnagit) kiisalu angallaviit kiffartuussinissamut isumaqatigiissuteqarfiusut aamma sullissisut apeqqutaatinnagit angallaviit niuernermik tunngaveqartut akornanni ingerlaqqinnissamut qulakkeerinerit oqaatigineqarsinnaapput.

Taakku saniatigut inaarutaasumik erseqqissaatigissavara, isumaqatigiissutaareersut taamaatinneqarsinnaanngimmata imaluunniit taamaatinneqassanngimmata. Disko Line-mut kiffartuussinissamut isumaqatigiissut, assilinera Kommune Kujallermut tunniunneqartoq, taamaatitsinissamut aalajangersakkanik imaqanngilaq. Akerlianik isumaqatigiissut illuatungeriinnut pituttuisuusoq ersarissorujussuarmik allassimavoq. Namminersornerullutik Oqartussat isumaqatigiissummi aalajangersakkanik sumiginnaanissamik siunertaqanngillat, taamaassappammi sullissisup taarsiiffigineqarnissamik piumasaqarnissaa, tamatumalu nunap karsianut aningaasartuuterpassuarnik nassataqarnissaa ilimagineqarsinnaavoq.

Matuma siuliani allassimasut tunngavigalugit ataatsimut isumaqarpunga, kommunip isummersuutit uteqattaagai aammalu piumasaqaatai atasinnaanngitsut isumaqatigiissutaareersup sumiginnarneqarnerani inuiaqatigiit aningaasaqarnerat eqqarsaatigalugu annertuumik  kinguneqartussaanerat isiginiarneqanngimmat akisussaassuseqanngitsutut isigineqarsinnaasut. 

Tamatta Kalaallit Nunaanni angallannerup ilusaannik pitsaasunik isumannaatsunillu, angallannerup ilusaanik innuttaasunut iluaqutaasumik ingerlasunik kissaateqarpugut. Kommune Kujalliup oqaloqatigiinnerup siumut ingerlanissaanut pilersitsiviulluartumik peqataanissaa, aammalu angallannerup ilusaasa januaarip ulluisa aallaqqaataanni atuutilerunik pitsaanerpaanik atugaqarfiunissaannut peqataanissaa qilanaaraara.

Taamatut oqaaseqarlunga kiffartuussinissamut isumaqatigiissutit pillugit oqallinneq naasutut isumaqarfigaara. 

Inussiarnersumik inuulluaqqusillunga

Martha Lund Olsen

 

Allakkap uuma imarisaanut tunngatillugu apeqqutissallit Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfimmut e-mailikkut attaveqarsinnaapput: box909@nanoq.gl