Naalakkersuisut namminiilivinnissamut aqqutissaq pillugu Savalimmiunit isumassarsiorput

Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen sapaatip akunnerani matumani Savalimmiunut tikeraarpoq. Angalanermut siunertaavoq namminiilivinnissamut ingerlaarnermi, pingaartumik Savalimmiunut inatsisinut tunngaviusussanik suliaqarnermi, Savalimmiut misilittagaasa tusagaqarfiginissaat.

Savalimmiuni inatsisinut tunngaviusussat piariilerput
Marlunngormat Naalakkersuisup Savalimmiuni lagmand Aksel V. Johannesen ataatsimeeqatigaa, taanna Savalimmiunut inatsisinut tunngaviusussat nutaat suliarineqarnerisa killiffiat pillugu ilisimatitsilluni. Naatsorsuutigineqarpoq savalimmiormiut 2017-imi inatsisinut tunngaviusussat nutaat pillugit innuttaasunik taasititsissasut. Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq:

”Isumaqarpunga nunat namminiilivinnissamut qanoq alloriartarnerannut tunngatillugu Savalimmiut aamma Kalaallit Nunaat misilittakkanik paarlaasseqatigiinnissaat pissusissamisoorluinnartoq. Aalajangersimalluinnartumik maannakkut Kalaallit Nunaanni inatsisinut tunngaviusussanut isumalioqatigiissitamik pilersitsinitsinni, Savalimmiut inatsisinut tunngaviusussanut missingiummik allannerminni misilittagaat annertoorujussuarmik iluaqutigisinnaavagut. Savalimmiut lagmand-ianik ataatsimeeqateqarneq annertuumik pissarsiviuvoq, aammalu suliassaqarfimmi tassani qanimut suleqatigiinnerup ingerlaannarnissaa qilanaaraara.”

Immuliorfimmi nammineq tunisassiorneqNamminiilivinneq aamma imminut pilersornermut tunngassuteqarpoq. Taamaattumik pisussanut pilersaarutip ilaatut Naalakkersuisup Savalimmiuni immuliorfik MBM pulaarpaa. Savalimmiormiut immuliorfimmi nammineq tunisassiornermik misilittagaqarluarput, tamannalu Naalakkersuisunut, Kalaallit Nunaata nunaateqarnermi tunisassianik imminut pilersorneranik siuarsaanissamik sulissutiginnittunut, soqutiginaateqarpoq. Avatangiisinut aamma silap pissusaanut suliassaqarfinni suleqatigiinneq
Aamma piffissaq iluatsillugu Savalimmiut aamma Kalaallit Nunaata avatangiisinut aamma silap pissusaanut suliassaqarfimmi suleqatigiinnerat oqallisigineqarpoq. Taamaalilluni sisamanngorpat Naalakkersuisup Savalimmiuni nunamut namminermut peqqissutsimullu ministeri Sirið Stenberg ataatsimeeqatigissavaa. Annertunerusunik paasisaqarniarnermi attaveqarfigineqassapput immikkoortortaqarfimmi pisortaq Camilla Østbirk, caos@nanoq.gl / tlf. 346019, imaluunniit naalakkersuisumut allatsi Naasunnguaq Olsen, nasu@nanoq.gl / tlf. 345414.