Nunani Avannarlerni Ministerit siunnersuisoqatigiiffianni sulisartuuneq pillugu ataatsimiinneq

Sulisartuuneq pillugu ulloq 29. november 2016 Helsinkimi Nunani Avannarlerni Ministerit Siunnersuisoqatigiiffianni ataatsimiinnermut Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq Vittus Qujaukitsoq peqataavoq.

Ataatsimiinnermi sammisaq pingaarneq tassaavoq siusinnerusukkut ministeriusup aamma EU-kommissærip Poul Nielsonip nunani avannarlerni suliffeqarnermi unammilligassat pillugit nalunaarusiaani inassuteqaatit sammineqarnissaat, ilanngullugu minnerunngitsumik qimaasunik aamma nunasisunik suliffeqarnermi akuunerulersitsinissaq.

Nalunaarusiap inassuteqaataani ajornartorsiutit pingaaruteqartorujussuit, Nunani Avannarlerni Ministerit Siunnersuisoqatigiiffianni suliareqqinneqartussat ilagaat, ilaatigut nunani avannarlerni suliffeqarnerup aaqqissugaanerani allannguuterpassuit, aammalu taakkua suliffeqarnermi aningaasarsiat sulinermilu atugassarititaasut, suliffeqarnermi susassaqaqatigiit akornanni isumaqatiginninniutigineqartartut attatiinnarneqarsinnaanissaannut taakkua pingaaruteqarnerat.

Nunani killerni aningaasaqarneq ullumikkut sullissinerup, attaveqaqatigiinnerup, siunnersuisarnerup il.il. iluanni suliffeqarfeerarparujussuit siuariartornerannit sunnersimaneqarpoq, sulisartut kattuffiini aamma sulisitsisut kattuffiini ilaasortat arlalitsigut ikilisimallutik.

Nunani avannarlerni ministerit ataatsimiinneranni sammisaq pingaaruteqartoq alla tassaavoq, nunani avannarlerni suliffeqarnermi pinngitsoorani inersimasut ilinniarnissaannik ilinniaqqinnissaannillu atuutsitsilernissamik periarfissaqarnissaq pillugu siunnersuut.

Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq Vittus Qujaukitsoq ilaatigut inersimasut ilinniaqqinnissaannik suliassaqarfiup nukittorsarneqarnissaanik pisariaqartitsinermut, Kalaallit Nunaat sinnerlugu tapersiivoq. Vittus Qujaukitsup tassunga atatillugu tikkuarpaa Kalaallit Nunaanni suliffeqarnermi suliffeqanngitsut 90 %-ii angullugit ilinniagaqarsimasuunngitsut, taamaattumillu ilinniartunik suliffimmilu sungiusartussanik atorfinitsitsinissamut inuiaqatigiit akisussaaffeqarnerat pillugu inatsimmik Naalakkersuisut sulissuteqartut.

Vittus Qujaukitsup aamma qimaasut nunasisullu akuunerulersinneqarnissaat pillugu oqaatigaa, nunanit allamiunut suliassaqarfiup akisussaaffigilerlugu tiguneqarnissaa Naalakkersuisut pilersaarutaannut ilaasoq, aammalu Kalaallit Nunaat tamatuma kingorna qimaasunut politikkimik aalajangersuisinnaalissasut.

Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq Vittus Qujaukitsup annertunerusumik oqaaseqartinniarneranut, Attaveqarfissaq: naalakkersuisup allattaa Helene S. Pedersen email hspe@nanoq.gl