Issittup sapangaa

Oqaluttuaaraliortitsinermik unammisitsinermi ajugaasut nassaarineqarput. Saammaateqatigiinnissamut Isumalioqatigiissitap Kalaallit Nunaanni inersimasunut 18-ileereersimasunut oqaluttuaaraliortitsinermik unammisitsineq naammasseqqammerpaa.

“Uagutsinnut pingaaruteqarsimavoq innuttaasunik peqataatitsinissarput oqaluttuaaraliornermik unammisitsinikkut “Issittup sapangaa”-nik qulequtaqartumik. Innuttaasunik akuutitsinerup isumalioqatigiissitami sulineq nukittorsarpaa, aammalu innuttaasunik qaninnerusumik attaveqarnermut iluaqutaalluni”. Taama oqaaseqarpoq siulittaasoq Josef Therkildsen.

Peqataasut periarfissaqarnikuupput oqaluttuaaraliartik allassallugu juunip qaammataaniit septembarip qaammataanut 2016, Kalaallit Nunaanni oqaluttuarisaanerup ineriartorneranik inuiaqatigiinnilu pissutsit aallaavigalugit. Oqaluttuaaqqat saammaateqatigiinnissamut tunngassuteqartussaatinneqarsimapput taakkunanilu Kalaallit Nunaanni siunissami saammaateqatigiinnissamut attuumassuteqartillugit qanoq isikkoqarsinnaaneranik allaaserineqartussaatillugit.

1.,2. aamma 3.-nngortut akissarsitinneqassapput marlunngorneq 29. november 2016, nal. 16.30-18.00 Katuami Ikinngutigiit Inaanni.