Akilersilluni peqquserluttuliortoqannginnissaanut politikkissaq nutaaq akuersissutigineqarpoq

Qaannat

Akilersilluni peqquserluttuliortoqannginnissaanut politikkissaq nutaaq Naalakkersuisunit sisamanngornermi 24 november 2016 akuerineqarpoq. Politikkissaq nutaaq peqquserlunnermut akuersaanngilluinnarnissamik aallaaveqarpoq.

Akilersilluni peqquserluttuliortoqannginnissaanut politikkissaq politikkikkut isummernerinnarmik aallaaveqartinneqanngilaq. Naalakkersuisut Qitiusumik Allaffeqarfianni suliffeqarfinnullu ataaniittuni sulisut tamarmik akilersilluni peqquserluttuliortoqannginnissamut najoqqutassanik aalajangersaasoqarpoq.

Politikissami nutaami peqquserluttuliorneq nassuiarneqarpoq nammineq iluanaaruteqarnissaq anguniarlugu pissaanermik tatigineqarluni tunniunneqarsimasumik atornerluinertut. Sulisup atorfimmi suliassat nassuiarnerisigut sulianik suliarinninnerit aalajangiinerillu sunnersinnaavai, taamaasillunilu pissaaneqarnini atorlugu. Imminut iluaqutissarsinerup kinguneraa ajunngitsorsiassaqarnissaq neqeroorutigineqarluni, pissaanini pingaarutilik atorlugu tigusisup sunnerneqarnissaa siunertaralugu.

Akilersilluni peqquserluttoqannginnissaanut politikkissami nutaami periaasissat arfineq pingasut ataani saqqummiunneqartut aallaavigineqarput:

  1. Inuttut soqutigisatta aamma Naalakkersuisut qitiusumik allaffeqarfianni suliffeqarfinnilu ataaniittuni soqutigisat akornanni soqutigisatigut akerleriinnerit pinngitsoortikkusuppavut.
  2. Akilersilluni peqquserlutsitsinerit suulluunniit akuerinianngilavut.
  3. Oqartussat suliarinninnerannik sunniiniarluni salloqittaaneq, peqqusersuusaarneq imaluunniit tatiginninnermik pakatsisitsineq atunngilagut.
  4. Namminerisamik siunertat atorlugit pisortani atorfeqarnerput atornerlunneratigut imaluunniit pissaanermik imaluunniit qunusaarinerit atornerisigut inunnik, ingerlatseqatigiiffinnit imaluunniit suleqatigiiffinnik sunniinianngilagut.
  5. Uatsinnut akisussaatinneqartunik nalilinnik tigusinikkut imaluunniit atornerluinikkut atorfipput atornerlukkusunngilarput.
  6. Oqartussatut suliarinninnitsinni sunniisunik imaluunniit sunniiniarnertut isigineqarsinnaasunik, toqqaannartumik toqqaannanngitsumilluunniit, tunisissutinik imaluunniit allanik iluaqutissanik tigusissanngilagut.
  7. Sulianik suliarinninnermut, atorfinitsitsinermut, pisinermut, ikiuinermut, kiffartuussinermut allanulluunniit atasumik uatsinnut atatillugu inunnik salliutitsissanngilagut.
  8. Peqquserlunnerit imaluunniit peqquserlunniarnerit suulluunniit nalunaarutigissavavut.

Akilersilluni peqquserluttoqannginnissaanut politikkissami pingaartumik immikkoortoq 8 suliarineqarsimavoq whistleblowerimik aaqqissuussinermik maj 2015-imili atuutsilersinneqartup malitsigisaatut. Whistleblowerimik aaqqissuussineq naapertorlugu Namminersorlutik Oqartussani atorfillit tamarmik ajunngitsussaq anguniarlugu kinaassutsimillu oqaatiginninngikkaluarlutik soorlu assersuutigalugu akiliilluni peqquserlutsitsineq, pinngitsaaliilluni iliuuseqartitsiniarnerit, paarititanik peqquserlunnikkut ajunaaruteqartitsineq, peqquserlulluni iluanaarniarneq, naatsorsuutinik allanngortiterineq il.il. pillugit oqaatiginnissinnaatitaapput. Tassunga tunngatillugu paasissutissat uani atuarneqarsinnaapput http://oqarit nanoq gl.

Akilersilluni peqquserluttoqannginnissaanut politikkissamut siunnersuut suliamut tunngatillugu kattuffinnut pisortanullu assigiinngitsunut tusarniutigineqarsimavoq. Tamatuma saniatigut siunnersuut immikkoortortaqarfinni suleqatigiinnissanut ataatsimiititalianut Pingaarnertut Suleqatigiinnermut Ataatsimiititaliamullu saqqumiunneqarsimavoq. Sulisut, tusarniarneqarsimasullu allat politikkissamut tapersersuillutik suleqataarusussuseqarnerat Naalakkersuisunit paasillugu nuannaajallannartorujussuuvoq.

Akilersilluni peqquserluttuliortoqannginnissaanut politikki uani atuarneqarsinnaavoq

Inussiarnersumik inuulluaqqusillunga

Aqqaluaq B Egede


Attaveqarfiit: Aqutsisoqarfimmi pisortaq Lars Dencker , toqq.: +299 53 98 11, lade@nanoq.gl