Qujaukitsoq Bruxellesimut

Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq, Vittus Qujaukitsoq, Bruxellesimut angalavoq ataatsimeersuarnermi: Arctic Futures Symposium, pingaarnertut oqalugiartuussalluni kiisalu NATO-mut Generalsekretær Jens Stoltenberg aamma Europaparlamentimi ilaasortat ataatsimeeqatigissallugit.

Ulloq 30. november 2016 Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq, Vittus Qujaukitsoq, Arctic Futures Symposiumimi peqataassaaq, tassani ataatsimeersuarnermi oqalugiartunut pingaarnernut ilaassalluni. Ukioq manna Arctic Futures Symposiumimi ilaatigut siunertaavoq, EU-mi Issittumut Politikki nutaaq pillugu isummannik anitseqatigiinniarluni, issittumi suliaqartuusut aammalu EU-mi soqutigisaqartut katersortinnissaat, ilanngullugu taanna Issittumi piujuartitsiviusumik ineriartortitsinerup tunngavissinnissaanut qanoq pingaaruteqarsinnaanersoq. Issittumi politikki akuutitsiviusoq pillugu EU-mi ataatsimoorussamik naammassisaqartut Europakommissionip ukioq manna siusinnerusukkut nalunaaruteqarpoq, EU-mi nunanut allanut susassaqarfinnut aamma sillimaniarnermut politikkimut aallartitaq qaffasissumik inissisimasoq peqatigalugu, naammassivaat. EU-mi issittumut politikki piffissami matumani Europa-Parlamentimi suliarineqarpoq, taamaattumillu Naalakkersuisut piffissami matumani Kalaallit Nunaata soqutigisaannik isummersuutaannilu Bruxellesimi immikkut ersaritsitsinissaat pingaaruteqarpoq.

Vittus Qujaukitsup taamaalilluni tikeraarnerup nalaani Europakommissioni aamma Europaparlamentimi inatsisartunut ilaasortat ataatsimeeqatigissavai, ilaassallutik Urmas Paet, Europaparlamentimi Nunanut allanut ataatsimiititaliami ilaasortaasoq aammalu EU-mi Issittunut Politikkimi nutaami nalunaarusiortuusoq, Sirpa Pietikainen, Europaparlamentimi Avatangiisinut, Inuit peqqissusaannut aamma Inuussutissat isumannaatsuunissaannut Ataatsimiititaliami ilaasortaasoq aammalu Issittunut Politikkimi nutaami nalunaarusiortuusoq aamma Ole Christensen Europaparlamentimi aalisarnermut ataatsimiititaliami ilaasortaasoq.

Tamatuma saniatigut Bruxellesimiinnerminut atatillugu Vittus Qujaukitsup NATO-mut Generalsekretær, Jens Stoltenberg, 1. december 2016 ataatsimeeqatigissavaa, tassani NATO-p maannakkut oqaluuserisassaniititat oqaluuserineqassallutik. Tamatuma saniatigut missil-inut illersornissaq oqallisigineqassaaq. Aamma Danmarkip NATO-mi Ambassadøria, kiisalu Islandip aamma Norgep NATO-mi ambassadørii Bruxellesimi persuarsiorfiunngitsumik ataatsimeeqatigineqassapput.

 

Annertunerusumik paasisaqarniarnermi attaveqarfissat:

Nunanut Allanut pisortaq Kai Holst Andersen +45 40 17 82 93

Sinniisoqarfimmi pisortaq Mininnguaq Kleist +32 499 99 98 58