Sunngiffimmi aalisartup kapisillit meqqiat pinnassutigivaa

Sunngiffimmi aalisartup Qaqortumeersup kapisillit nalunaaqutaannik nassiussimasutut  ullumi, novembarip 28-anni ukioq manna akissarsitinneqarpoq, NASCO-p akissarsissutigisartagaanik West Greenland Tag Returnimik 1.500 dollarsinik akissarsisinneqarluni, 10.545 koruuninik.

Sunngiffimmi aalisartoq soraarneq, nersutinik toqoraasoq, kapisillip meqqia Pinngortitaleriffimmut  nassiussimavaa.

Kapisilik Qaqortup eqqaani Akinnaani septembarimi 2015-imi pisarisaa, Sverigep kuuisa ilaanni Nissanimi 2014-imi meqqilerneqarsimavoq.

Kristian Isbosethsen Qaqortup kitaani 1970-ikkuunnili kapisilinniartalerpoq.

- Ukiut tamaasa kapisilinniartarpunga, nuliaralu ukioq naallugu nerilluartakkatsinnik, taakkulu perlukui atorluartaqaagut, naatsivitsinnut naggorissaatitut atorluarneqartarlutik.

Ilaqutariit eqqaminni orpeqarput namminneq ikkussaminnik.

Orpiit assigiinngitsut 1997-imi 1998-imilu ikkussuuppavut, taakku Qaqortumi kusanarnerit ilagaat, Kristian Isbosethsen oqaluttuarpoq.

- Namminneerluta naggorissakkagut nerisarpagut, soorlu naatsiiat, majruuat, radisit, rabarbarit allallu, soorunalimi aamma kapisillit, Kristian Isbosethsen oqarpoq.

Aalisarnermut aamma Piniarnermut Naalakkersuisup, Hans Enoksenip NASCO, North Atlantic Salmon Conservation Organization akissarsiaritittagaa tunniuppaa.

Aalisarnermut aamma Piniarnermut Naalakkersuisoq, Hans Enoksen, aamma NASCO-p præsidentiata, Steinar Hermansen, Kristian Isbosethsen pilluaqqorujussuarpaat.

Kapisilinnut nalunaaqutsiunneqartartut pisoqalineq ajorput, qangalili pisaasimasut nalunaaqutaat nassiunneqarsinnaasarlutik.  Soorlu Kristian Isbosethsenip pisaata tamanna uppernarsisikkaa, pisaa 2014-imi nalunaaqutserneqarsimagami.

NASCO

NASCO tassaavoq nunat naalakkersuisuisa suleqatigiiffiat, kapisilinnik Altantikup avannarpasissuaniittunik peqartuaannarnissaanik suliniaqatigiiffiat, kapisileqatigiit qularnaatsumik  aqutsinikkut piujuaannaqqullugit suliniaqatigiiffiusoq. 

NASCO-p Atlantikup avannarpasissuani kapisileqartuarnissaanik suliaqarnerminut ilanngussimavaa kapisillit nalunaaqutsersortarlugit. Suliniaqatigiiffiullu tamaani najugallit kajumissaarpai kapisilinnik nalunaaqutalinnik siumugaqarsimagunik,  taakku nassiuttassagaat sumi qangalu pisaasimaneri ilanngullugit ilisimatitsissutigineqartassasut.  Taamaalilluni kapisillit nuuttarneri tamatumuunakkut ilisimasaqarfiginerulissammata.

Nunatsinni kinaluunniit nalunaaqutalimmik kapisilittoq, pisarisami nalunaaqutaa Pinngortitaleriffimmut nassiussinnaavaa. Pinngortitaleriffiup nalunaaqutaq NASCO-mut nassiuttarpaa, suliniaqatigiiffillu ukiut tamaasa ataatsimiinnermini nalunaaquttanik nassiunneqarsimasunik makitsisarpoq, makinneqartoq 1.500 dollarsinik aningaasartalinnik akissarsisinneqartarluni.

Attavigineqarsinnaavoq John Biilmann, AC-fuldmægtig, Aalisarnermut Piniarnermullu Naalakkersuisoqarfik. Email: johb@nanoq.gl