Danmarkip saliinissamut pisussaaffini qimarratigisinnaanngilai

Allattoq Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen

Allarpassuit assigalugit ulloq 23. november 2016 KNR-imi atuarpara Illersornissamut ministereqarfiup oqarnera malillugu maannakkut Kangilinnguit ammaqqinnissaa isumaliutersuutigineqartoq. Taamatut oqariartuuteqarneq tupaallaatigaara, tamatumalu kingorna atorfilittakka Illersornissamut ministereqarfimmut saaffiginneqquakka avammut oqariartuuteqarneq sumut tunngassuteqarnersoq itisilertinniarlugu. Danmarkimut erseqqissarusuppara sukumiisumik avatangiisini saliisoqassasoq. 

Kangilinnguit ammaqqinneqarnissaat Danmarkip saliinissamut pisussaaffimminik qimarratiginninniarneranut tunngassuteqarsimappat, tamanna Kalaallit Nunaannit akuersaarneqarsinnaanngilaq. Illuutit, maannakkut annertunerusumik annikinnerusumilluunniit aserfallassimasut, saniatigut sumiiffiup ilarujussuani nuna annertuumik uuliamik mingutsinneqarsimavoq. Mingutsitsineq salinneqassasoq Namminersorlutik Oqartussanit piumasarineqarpoq, taamaalilluni uulia Arsuup Kangerluanut kuutsinneqassanngimmat, minnerunngitsumillu kingorna peqqissutsikkut aarlerinartorsiorfiunngitsumik sumiiffik najugaqarfittut allatulluunniit atorneqarsinnaassammat.

Avatangiisini saliinissaq pillugu isumaqatiginninniarnernut nukippassuit nunatsinniit atoreerpagut. Ukiuni arlalinni isumaqatiginninniareernerit kingorna, Kangilinnguani avatangiisinik saliinissaq pillugu politikkikkut isumaqatigiissummut missingiut inaarutaasoq, ulloq 30. juni 2016 Namminiilivinnermut, Pinngortitamut, Avatangiisinut Nunalerinermullu Naalakkersuisoqarfiup Illersornissamut ministereqarfimmut nassiuppaa. Tamatuma kingorna Illersornissamut ministereqarfiup missingiut pillugu uterfigeqqinngilaatigut, taamatullu ataatsimiinnissaq pilersaarutigineqartoq taamaatinneqarluni. Kiisami tusagaqarpugut tamannalu tusagassiuutitigut nutaarsiassatigut pivoq, oqaatigineqarluni Illersornissamut ministereqarfik tassanngaannaq allarluinnarmik pilersaalereersimasoq, tamanna nunatsinniit akuersaarneqarsinnaanngilaq. Atorfilittama maannakkut Illersornissamut ministereqarfik attaveqarfigaat aammalu nukingiussamik ataatsimiinnissaq piumasaralugu.

Isumannaatsumik avatangiisini saliisoqassasoq taama sivisutigisumik isumaqatigiissutiginiarneqassasoq, Naalakkersuisut akuersaarsinnaanngilaat. Kangilinnguani siunissami qanoq pisoqassagaluarpalluunniit, avatangiisit aammalu sumiiffimmi mingutsitsinerup isumagineqarnissaat pisariaqarluinnarpoq. Sakkutooqarfiup illuutai tassaniipput, taamaalilluni sakkutooqarfik tassaavoq taakkua pillugit aalajangiisussaq.

Piffissaq sivitsoraluttuinnartillugu Danskit akisussaasut iliuuseqannginnerisigut Kangilinnguit aserfallakkaluttuinnartippaat, taamatullu avatangiisini saliinissaq pisariaqavissoq ingerlanneqarani, tamannalu qanoq pisoqaraluarpalluunniit akuersaarneqarsinnaanngilaq.