Kulturimut aningaasaliissutaannik agguaassineq 2016-imi kingulleq

2016-imi Namminersorlutik Oqartussaniit Kulturimut aningaasaliissutaannik agguaassineq kingulleq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup, Doris Jacobsen-ip, 2016-imi kingullermik qinnuteqaateqartitsinermut atatillugu suliniutinut assigiinngitsunut 16-inut katillugit 1.785.290,00 koruuninik tapiissutinik agguaassivoq. Aningaasat agguaanneqartut aningaasaliiffinniit pingasuniit ataani pineqartuniit agguaanneqarput.

Kultureqarnermut aningaasat

Kultureqarnermut aningaasanit suliniutinut assigiinngitsunut arfinilinnut 504.155,00 koruuninik tapiissutinik tunniussisoqarpoq, taakkunannga ilaatigut eqqumiitsulianik saqqummersitsinerit, isiginnaartitsinerit assigisaallu matussusiivigineqarput. Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput. 

Filmiliornermik ingerlataqartunut aningaasat

Filmiliornermik ingerlataqartunut aningaasanit filmiliornermik pilersaarutinut pingasunut katillugit 560.000,00 koruuninik tapiissutinik tunniussisoqarpoq. Filmiliornermik ingerlataqartunut aningaasanit kalaallit filmiliornermik pilersaarutaanut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkat kalaallisoortut

Taakku qaavisigut atuakkanut kalaallisoortunut assigiinngitsunut arfinilinnut aningaasanik katillugit 721.135,00 koruuninik agguaassisoqarpoq. 

Ukiumi matumani kingullermik qinnuteqaateqartitsinermi sulinermut aningaasaliissutinik tunniussisoqanngilaq.

Qinnuteqartut aningaasaliissutinik tapertinnikut allattorsimaffiat nittartakkami www.naalakkersuisut.gl-imi aaneqarsinnaapput. 

Qinnuteqarnissap tullianut piffissaliussaq ulloq kingulleq tassaavoq 1. februar 2017. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartakkakkut www.sullissivik.gl-ikkut

Sukumiinerusumik paasisaqarnerorusukkaanni kulturimut siunnersorti Mika Lyberth telefon 34 57 44-mut sianerluni imaluunniit e-mail mlyb@nanoq.gl-imut allalluni attavigineqarsinnaavoq.