Naalagaaffiit Peqatigiit Meeqqat pillugit Isumaqatigiissutaat pillugu annertuumik soqutiginninneq

Naalagaaffiit Peqatigiit Meeqqanut ullorititaat sapaatiuppat ulloq 20. november 2016 nalliuttorsiutigineqassaaq, tamatumanilu aamma Naalagaaffiit Peqatigiit Meeqqat pisinnaatitaaffii pillugit Isumaqatigiissutaat (Naalagaaffiit Peqatigiit Meeqqat pillugit Isumaqatigiissutaat).

Kalaallit Nunaani meeqqanut atugassarititaasut annertuumik aallutarineqarput, tamatumani Naalagaaffiit Peqatigiit meeqqat pisinnaatitaaffii aallutarineqarlutik. Tamatumani minnerunngitsumik suliffeqarfiit ingerlatsiviit kattuffeqarfiillu arlariit aallussineri peqqutaaqataavoq, soorlu meeqqat pisinnaatitaaffii pillugit ingerlatsivik MIO, sulianik ingerlatsinermini Meeqqat pisinnaatitaaffii pillugit ilisimaqarnerulernissap siammarterneqarnissaanilu suliniuteqarneri aammalu Meeqqat pisinnaatitaaffiinik eqquutitsinissanik qulakkeerinninnissani suliniuteqarnerni annertuumik suliaqarfeqarpoq.

”Meeqqat pisinnaatitaaffiinut atatillugu uagut angajoqqaajusugut inersimasuusugullu meeqqanut atugassarititaasut pillugit aallussinerunissaq akisussaaffigaarput. Taamaammat meeqqanut atugassarititaasut aammalu ilaqutariinni atugassarititaasut pillugit suliniuteqartunut tamanut qujarusuppunga tamatumanilu meeqqat pisinnaatitaaffii pillugit ilisimasaqarnerunissamik siammarterinermik suliaqartunut tamanut aammalu meeqqanut atugassarititaasut ilaqutariinnullu atugassarititaasut pitsanngorsarneqarnissaanik suliniuteqartunut tamanut qujarusuppunga,” Sara Olsvig, Isumaginninnermut Ilaqutariinnut Naligiisitaanermut Inatsisinillu atortitsinermut Naalakkersuisoq oqarpoq.

Meeqqanut atugassarititaasut pillugit pitsanngorsaatissanik inatsisissatut siunnersuut nutaaq Inatsisartut upernaakkut ataatsimiinnissaannut saqqummiunneqassaaq 

 Inatsisartut upernaakkut 2017-imi ataatsimiinnissaani meeqqanik ikorfartuiffissat pillugit inatsissatut siunnersuutissaq nutaaq saqqummiunneqassaaq.

”Meeqqanik ikorfartuinissanik inatsissatut siunnersuusiassami suliassatsinni qanoq iliorluta Naalagaaffiit Peqatigiit Meeqqat pisinnaatitaffii pillugit isumaqatigiissutip eqquutsinneqarnissaani suliniuteqarnissatsinni paasissutissat pitsaaqisut tigusimalerpagut,” Sara Olsvig oqarpoq, naggasiillunilu, ”Meeqqanut inuusuttunullu suliniutissat arlariit aallarnisaareerpugut ingerlatsivigalugillu, sulilu allanik nutaanik suliaqarluta ingerlatsileruttorpugut. Suliniutigineqartuni tunngaviusumik toqqammaviupput meeqqanut atugassarititaasut pitsanngorsarneqarnissaat aammalu isumaginninnermik suliassaqarfimmi sullissisunut sulinermi atugassarititaasut pitsanngorsaavigineqarnissaat. Suliniutissat ingerlanneqartussat amerlaqisut inatsisissatullu siunnersuutissap nutaap suliarineqarnissaani meeqqanut tamanut siunissamik pitsaanerusumik pilersitsinissat kissaateqarfigigipput suliniuteqarusussuseqarnitsinnullu aamma ersiutaapput”.

Naalagaaffiit Peqatigiit Meeqqat pillugit Isumaqatigiissutaat Naalagaaffiit Peqatigiit ataatsimeersuarnerani 1989-imi akuersissutigineqarluni atuutsinneqalerpoq. Kalaallit Nunaata isumaqatigiissut 1993-imi atuutsilerpaa.

Meeqqat tamavimmik avatangiisini atugassarititaasunilu pitsaasuni peqqinnartunilu alliartorfeqarlutik peroriartorfeqarnissaanik pisinnaatitaaffiinik Naalagaaffiit Peqatigiit Meeqqat pillugit Isumaqatigiissutaat toqqammaviliivoq, atuariartorsinnaatitaanernik, siunissaminnik nammineq oqartussaaqataanerinik soorluttaaq meeqqat atornerlunneqarnissamut assigiinngisitsinernullu illersugaallutik inuunissaanut toqqammaviliisoq. 

Kalaallit Nunaat ukiut tallimakkaarlugit Naalagaaffiit Peqatigiit Meeqqat pillugit Isumaqatigiissutaanik eqquutitsinerluni misilinneqartarpoq. Ukioq 2017-imi tulliani Kalaallit Nunaat misilinneqassaaq, tamatumani Naalagaffiit Peqatigiit Meeqqanut ataatsimiititaliaata (Børnekomite) nalunaarusiaa august 2016-imi tunniunneqartoq tunngavigalugu.


Paasissutissanik annerusumik paasisaqarusukkuit attavigineqarsinnaavoq Naalakkersuisup allattaa Sina M. Kristiansen, e-mail nimk@nanoq.gl.