Naalakkersuisut tunngaviusumik inatsisiliornissamut ataatsimiititalialiornissamik kissaateqarput

Tunngaviusumik inatsisissamik siunnersuusiortoqarnissaa tunngavigalugu tunngaviusumik inatsisiliornissamut ataatsimiititaliamik pilersitsisoqarnissaata oqaluuserineqarnissaa siunertaralugu Inatsisartut tuaviortumik ataatsimiigiaqquneqarput Naalakkersuisut kalaallit tunngaviusumik inatsisissaannut ataatsimiititaliaannik pilersitsinissaq pillugu nassuiaat tamanut ammasumik aamma saqqummiuppaat. Naalakkersuisut nassuiaat atorlugu Inatsisartut innuttaasullu tamaasa namminersornissap tungaanut aqqutissat pillugit oqallinnissamut peqataaqqullugit kajumissaarpaat.

Tunngaviusumik inatsisiliornissamut ataatsimiititaliap suliassani aallarnerlugit tunngaviusumik inatsisissamut, tassalu Kalaallit Nunaanni aqutseriaatsimut aaqqissuussaanermullu maleruagassanut tunngaviusunut missingiutip oqaasertassaanik ataatsimoorluni allannissaq suliarissavaa. 

Namminersornermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq:

”Kalaallit tunngaviusumik inatsisissaannik suliaqarneq namminersulernissap tungaanut alloriarnerussaaq pingaarutilik. Taanna siunissaq eqqarsaatigalugu suliaavoq, aammalu namminersortutut naalagaaffinngornissamut aqqutissamut piareersarnerit pingaarutillit ilagaat. Tunngaviusumik inatsit ataatsimoorluta naleqartitatsinnik kulturitsinnillu tunngaveqassaaq. Kikkut tamarmik suliassami suleqataanissaat pisariaqartinneqarpoq. Taamaattumik Naalakkersuisut kalaallit tunngaviusumik inatsisissaannut ataatsimiititaliaannik pilersitsinissaq pillugu siunnersuutaata ullumi ataasinngorpallu Inatsisartuni suliarineqarsinnaalereernera nuannaarutigaara.”

Kalaallit tunngaviusumik inatsisissaannik suliaqarnerup piaartumik aallartinneqarnissaa Naalakkersuisunut pingaaruteqarpoq. Tamatuma peqatigisaanik Naalakkersuisunit erseqqissaatigineqassaaq, inuiaqatigiinni inatsit tunngaviliinerpaaq pillugu sulinissamut aalajangiinerit Inatsisartuni pisartussaammata. Taamaattumik Inatsisartut tunngaviusumik inatsisiliornissamut ataatsimiititaliamik pilersitsinissaat pillugu aalajangiiffigisassatut siunnersuummik Naalakkersuisut saqqummiussipput. 

Nassuiaammi tunngaviusumik inatsisiliornissamut ataatsimiititaliamik pilersitsinissaq pillugu Inatsisartuni oqallinnerit tunngavissaqarluarnissaat siunertarineqarpoq. Nassuiaammi ataatsimiititaliaq taamaattoq qanoq ililluni pilersinneqarsinnaanersoq allaaserineqarpoq, ataatsimiititaliallu suliassaanut siunnersuuteqartoqarluni.  

Inatsisartut tunngaviusumik inatsisiliornissamut ataatsimiititaliamik pilersitsinissaat pillugu Naalakkersuisut aalajangiiffigisassatut siunnersuutaata Inatsisartuni ulloq 19. aamma 21. nov. 2016-imi suliarineqarnissaa pilersaarutigineqarpoq.  Kalaallit tunngaviusumik inatsisiliornissamut ataatsimiititaliaannik pilersitsinissaq pillugu nassuiaat uani atuarneqarsinnaavoq.  

Kalaallit tunngaviusumik inatsisiliornissamut ataatsimiititaliaannik pilersitsinissaq pillugu nassuiaat.


Annertunerusumik paasisaqarusunnermi immikkoortortamut pisortaq Camilla Østbirk, e-mail caos@nanoq.gl oqarasuaat +299 34 60 19-imut, imaluunniit naalakkersuisup allattaa Naasunnguaq Olsen, e-mail nasu@nanoq.gl oqarasuaat +299 34 54 14-imut attaveqarfigineqarsinnaapput.