Isumaginninnermi ikiorsiissutisisartut ajornerusumik inissinneqassanngillat

Inatsisartunut Naalakkersuisunullu ammasumik allagaqaammi, GE-p atorfillillu kattuffii arlallit 14. november 2016-imi oqaatigaat, Naalakkersuisut aningaasarsianit akileraarutit pillugit inatsisissatut siunnersuutaat (UKA2016/22) soraarnerussutisiassanut katersisut ilaannut aningaasartuuteqarnerunermik kinguneqarnissaanik ernummateqarlutik.

Ernummatigisariaqanngilarli. Aningaasarsianit akileraarutit pillugit inatsisissatut siunnersuummi, maanna Inatsisartut ataatsimiinneranni suliarineqartumi, kattuffiit ajornartorsiutitut taasaat Naalakkersuisut sillimaffigereerpaat.

Kattuffiit ernumanerannut tunngaviuvoq, soraarnerussutisiaqarnissamut ileqqaakkanut nunani allaniittunut akiliinerit 2017 aallartiffigalugu ilanngaatigineqarsinnaajunnaassammata. Siunnersuut, UPA2016-imi akuersissutigineqartoq, maanilu nunami akileraarutinit iluanaarutinik atatitsiinnarnissamik siunertaqarpoq. Tamanna ilaatigut isumaqarpoq, soraarnerussutisiaqarnissamut ileqqaakkanut nunani allaniittunut akiliinerit siunissami isertitatut akileraarusigassatut naatsorsorneqartalissammata.

Matumani kattuffiit ilaatigut tikkuarpaat, pisut ilaanni, akileraartartup isertitai akileraarusigassat amerlissasut, naak pineqartup isertaani piviusumik qaffariartoqanngikkaluartoq. Akileraartartoq isertitat apeqqutaatillugit pisortanit ikiorsiissutinik imaluunniit tapiissutinik pisartoq, imaluunniit akileraartartup isertitat apeqqutaatillugit pisortanut akiliutigisartagai annertussuseqartut, taamaasilluni ikiorsiissutisiarisartagaanik annikilleratarsinnaapput imaluunniit akiliutigisartagai annertuseratarsinnaallutik.

Ajornartorsiut tamanna Naalakkersuisunit qangali nassuerutigineqarpoq, aaqqinniarlugulu suliaqartoqalereerluni.

Siullertut, ajornartorsiutit 2017-imi pilersinnaasut aaqqinneqassapput. Tamanna pissaaq, aningaasarsianit akileraarutit pillugit inatsimmik, Inatsisartut ataatsimiinneranni matumani suliarineqartumi, allanngortitsinikkut pissaaq. Tulliullugu 2017-imi inatsisissatut siunnersuummik, 2018-imi siumullu ajornartorsiutinik takkuttoqannginnissaanut qulakkeerinnittussamik saqqummiussisoqassaaq.

Ajornartorsiutit aaqqiissutissallu inatsisissatut siunnersuummi, ukioq manna 12. augustimi Inatsisartunut nassiunneqartumi nassuiarneqarput.

Qulaani paasissutissat GE-mut kattuffinnullu ilisimatitsissutigineqarsinnaasimagaluarput, taakku Naalakkersuisunut saaffiginnissimagaluarpata.

Inussiarnersumik Inuulluaqqusillunga

Aqqaluaq B. Egede
Aningaasaqarnermut Akileraartarnermullu Naalakkersuisoq

Kontakt: Martin Christiansen (Finansdepartementet) Toqq/direkte 345651 MCHR@nanoq.gl