Qimmit tamarmik akiuussutissamik kapineqassapput

Qimmit tamarmik qimmit nappaataannut akiuussutissamik kapineqassapput

- Nuannaarutigaara Inatsisartut akerliusoqaratik qimmit tamarmik aammali qimmit qimuttut qimmit nappaataannut aamma parvovirusimut akiuussutissamik kapineqartarnissaannut akuersimmata.

Qimmillip qimmini inatsisitigut piumasaqaataasoq naapertorlugu  akiuussutissamut kapitittussaallugit. Savaatillit qimmii aamma qimmit qimuttuunngitsut matumani pineqarput, Aalisarnermut Piniarnermullu Naalakkersuisoq, Hans Enoksen oqarpoq. 

Aamma inatsisitigut piumasaqaataavoq qimmillip qimmini nalunaarsortillugulu meqqilertittussaavaa, taamaalilluni pisortanit akiuussutissamik kapitinneqarsimanersoq nakkutigineqarnissaa piuminarnerulissalluni.

 

Qimmit 18.000-t

Ilimagineqarpoq 18.000-t missaannik qimmeqartoq. 

Namminersorlutik Oqartussat qimmit tamaasa akiuussutissamik kapitinneqartarnissaannut suliniutigineqartoq akilissavaat. 

 

Qimminut qimuttunik savaatillillu qimmiinik akiuussutissamik kapuinissamut   meqqilersuinissamullu suliniutigineqartoq nunatta karsianit aningaasalerneqassaaq, qimminik qimuttuunngitsunik  qimmillit namminneq akiliisassasut, soorlu maannakkut namminneerlutik akiliisartut. 

Akiuussutissamik 2017-imi kapuilerneq Namminersorlutik Oqartussat 4.5 million koruunit missaannik aningaasaliiffigissagaat naatsorsuutigineqarpoq. 

Najukkani akiuussutissamik kapuinerit, nalunaarsuinerit meqqilersuinerillu kommuninit akisussaaffigineqassapput, Naalakkersuisunit nakkutigineqassalluni. 

Naalakkersuisut aamma qimmit nappaataannut akiuiniarnermi pitsanngorsaatinik siunertamullu naapertuuttunik arlalinnik suliniuteqassapput, taamaalillunilu kommunini suliassat malunnaatilimmik oqinnerulersinneqassallutik. 

Tamanna ilaatigut pissaaq paasissutissanik qarasaasiamik katersuiviliornikkut, tassuuna nalunaarsuinerit allallu oqinnerusumik aqunneqarsinnaalissallutik. 

Kommunit qimminut akiuussutissamik kapuisartunik sulisoqareerput ilaatigut perlerornermut akiuussutissanik kapuisartunik.

- Qimmeq qimuttoq Kalaallit Nunaata oqaluttuarisaaneranut ilaavoq sulilu piniartunit aalisartunillu piniarnernut piniakkanillu assartuinernut atorneqartorujussuulluni, Hans Enoksen oqarpoq. 

- Taamaammat qimmit taakku sapinngisannguarput tamaat atorlugu illersornissaat pingaarluinnarpoq, qimmit iluamik pineqarlutik peqqissuunissaat  aamma siunissami inuuniarnitsinnut piorsarsimassutsitsinnullu tunngaviujuarnissaat qulakkeersinnaajumallugu, Aalisarnermut Piniarnermullu Naalakkersuisoq erseqqissaavoq. 

Attavigineqarsinnaavoq Uumasut Nakorsaqarfia Inuussutissalerinermillu Oqartussaaffimmi immikkoortortami pisortaq, Óluva Niclasen. Email: olni@nanoq.gl