Persuttaasartut katsorsarneqarnissaminnik neqeroorfigineqarput

Naalakkersuisut peqqarniisaartarnermiit aniguisitsiniarlutik  2014-miit 2017-mut periussaannut atasumik piviusunngortitsinissaq siunertaralugu Isumaginninnermut, Ilaqutariinnut, Naligiissitaanermut Inatsisinillu atortitsinermut Naalakkersuisoqarfik novemberip 21-anni Katuami Ikinngutigiinnerup Inersuani inunnik aappaminnut peqqarniisaartartut kamassartarnermillu ajornartorsiuteqartut katsorsarneqarsinaanerannik neqeroorut tusarliunniarpaa.

Katsorsarneqarnissamik neqeroorut taaguuserneqarpoq Alliaq, Ole Brandt-ip piniartoq Qooqa pillugu atuakkiaani inuttaasut ilaat atsiullugu. Qooqap inuiaqatigiinni peqqarniisaartarnerit sinnganerillu akiorniarpai, aanaaminillu Alliamit isumaginnilluartumit silatuumillu  siunnersorneqartuarpoq, Alliap takutittuarpaa persuttaaneq ajornartorsiutinik aaqqiineq ajortoq, akerlianilli ajornartorsiutinik peqqarniisaarnernillu pilersitsisartoq. 

 Inuit aappaminnut nakuusertartut amerlanertigut aappariinnerminni eqqissisimallutillu asaqatiigiinnissartik kissaatigisaraluarpaat. Misigissu-sertilli kamammik ilaqartoq  aqussinnaaneq ajorlugu. Amerlasuullu nalunngikkaluarpaat persuttaasarnermikkut qitornatik aliasutsillugillu ajoqusertarlugit, taammaanneratalu kingunerisaanik  qaniginerpaasaminnik persuttaasarunnaarnissartik kissaatigisarlugu.

Alliami paasititsiniaanermi anguniagaavoq persuttaasartut anniartitsisarnertik nassuerutigissagaat, akisussaafitsillu paasissagaat, kinguneranillu aapparminnik naalliutitsisarnertik unitsissagaat. 

Alliami suliarinninnermi periusaavoq inuit ataasiakkaarlugit tarnit nakorsaannit oqaloqatigineqartarneri. Suliarinninnerup nalaani katsorsarneqartup aporaannernik qaangiiniartarnerni, kiisalu missigissutsikkut sualuttumik attorneqartarnermik qaangerniarnissaat - annersaaneq atornagu ilinniartarpaat. Alliami suliniuteqarnerup nalaani aamma neqeroorutaasarpoq persuttaasartup aappaanik oqaloqateqartarnerit, katsorsarneqarnerup pitsaassusaa qaffakkumallugu aammalu aappaasup suliarineqarnerup kingorna nukittunerulluni piareersimanerullunilu inissisimanissaa anguniarlugu.     

”Alliap ammarneqarnera aappanik persuttaasarnerup pinaveersaartinneqarnerani alloriarneruvoq pingaaruteqarluinnartoq. Angerlarsimaffinni annersaasarnerit amerlasuutigut kinguariinnit nanginneqartarput, ilisimatuullu misissuinerisa aammalu sulinermi ilikkakkat takutereerpaat annersaanernik isigisaqartarnerit meeqqanut ajorluinnartunik kinguneqartartut ilisimavarput. Sunniuteqarnerpaamik inooqataanermi kingornussanik pitsaanngitsunik qimatsiniarneq tassaavoq aappanik annersaasarnerup unitsinneqarnissaa. Tamannalu Alliami suliniutit pingaarnersaraat”, taama oqarpoq Naaalakkersuisoq akisussaasorlu, Marta Lund Olsen.   

Alliaq Nuummi, Sisimiuni, Qaqortumi Ilulissanilu tarnit nakorsaannik atorfeqartitsivoq. Suleqatigineqarporlu katsorsaalluni suliarinninnermi neqerooorut, Dialog Mod Vold  suleqatigiissutigineqarlutilllu katsorsaanerni periutsit siunnersuisarnerillu.

Sukumiinerusumik paasisaqarussuttut attavigisinnaasaat:

Immikkut siunnersorti Torben Weyhe, oqarasuaat 34 66 43, imaluunniit E-mail: twey@nanoq.gl