Amerlanerussuteqartut aatsitassarsiornermi aningaasaateqarfik pillugu isumaqatigiipput

Mine

Aatsitassarsiornermi Aningaasaateqarfiup aaqqissuussaanera pillugu oqallinneq ukiuni arlalinni ingerlasimavoq – maannakkulli aaqqiissuteqartoqarpoq: Kalaallit Nunaata Aatsitassarsiornermi Aningaasaateqarfia pillugu inatsimmut Naalakkersuisut allannguutissatut siunnersuutaat Inatsisartuni isumaqatigiittuni akuersissutigineqarpoq.

Piviusumik sivisuumik imaassimavoq, aatsitassarsiornermi isertitat annertuut, aatsitassarsiornermi aningaasaateqarfik pillugu inatsimmi ilaasut, aatsitassarsiornermi aningaasaateqarfimmut ilanngunneqartassasut. Isertitat taamaattut pingaarnertut ilagaat misissueqqaarnernit, misissuinernit kiisalu aatsitassanik atuinermit isertitat. Inatsisissatut siunnersuummik akuersissutigineqartumik inatsit erseqqissarneqarpoq, taamaalilluni pigisat tigussaasut aatsitassarsiornermi pingaarnertut pilersinneqarsimasut imaluunniit atorneqarsimasut, Namminersorlutik Oqartussat pissarsiaat maannakkut aatsitassarsiornermi aningaasaateqarfimmut atatillugu aatsitassarsiornermi isertitatut isigineqarunnaassapput. Tamanna sivisuumik Inatsisartuni kissaatigineqarsimasoq, maanna piviusunngortinneqarpoq.

Aatsitassarsiornermi Aningaasaateqarfimmik anguniagaavoq, aatsitassarsiorfimmit isertitat Kalaallit Nunaata aningaasaqarnerata patajaatsumik atasinnaasumillu ineriartortinnissaanut qulakkeerinninnissamut atorneqassasut, ukiuni ataasiakkaani qanoq isertitaqartigisoqarsimanera apeqqutaatinnagu. Aatsitassarsiornermi Aningaasaateqarfimmi aningaasaatinik taama atuinerup aamma nunatta ataanit isertitatta siunissami kinguaariinnut iluaqutaanissaanut Naalakkersuisut kissaataanik tapersiivoq.

”Namminersulivinnissaq anguniarlugu Naalakkersuisut ersarissumik anguniagaqarput. Anguniagaq tamanna ataatsimoorussaasoq piviusunngortinneqassappat, pilersaarusiorluarnissaq kiisalu isertitat patajaatsut pisariaqartinneqarput. Taamaattumik tunngavissaqarluarpoq, Aatsitassarsiornermi Aningaasaateqarfik pillugu allannguutissatut siunnersuutitta Inatsisartunit isumaqatigiissunit akuersissutigineqarnerata tulluusimaarutiginissaa.”, Aqqaluaq B. Egede, Aningaasaqarnermut Akileraartarnermullu Naalakkersuisoq iluarisimaarinnilluni taama oqarpoq.

Paasissutissat:

Kalaallit Nunaata Aatsitassarsiornermi Aningaasaateqarfia pillugu inatsimmut akisussaaffik naalakkersuisoqarfinni arlalinni inissisimasimavoq, siullermik Inuussutissarsiornermut, Aatsitassanut Suliffeqarnermullu Naalakkersuisoqarfimmi. Aningaasaateqarfimmillu akisussaaffeqarneq 2016-imi Aningaasaqarnermut Akileraartarnermullu Naalakkersuisoqarfimmut nuuppoq.

Naalakkersuisut inatsisissatut siunnersuutaat, Inatsisartut ukiakkut ataatsimiinneranni immikkoortoq UKA2016/23-tut tallimanngornermi 11. november akuersissutigineqarpoq.

Uannga Aqqaluaq B. Egede, Aningaasaqarnermut Akileraartarnermullu Naalakkersuisoq