Napparsimasut isumannaatsuunissaat tamanit salliutinneqarpoq

Napparsimasut isumannaatsuunissaat tamanit salliutinneqarpoq

Napparsimasut pilattaalluni suliaritissappata isumannaatsuunissaat pingaarnerpaatinneqartariaqarpoq. Tamannalu tunngavigivaa peqqissaavinni minnerusuni pilattaanernik suliaqartoqarnissaanut piumasaqaateqarunnaarnera.

Nakorsat atuagassiaanni Nakorsanut-mi SermitsiaqAG-mi allaaserisatut saqqummiunneqartumi saarngit nakorsaata Finn Eldonip ajuusaarutigaa peqqissaaveeqqani pilattaalluni suliarinnittoqarsinnaajunnaarsimanera.

-”Finn Eldonip isumaa ataqqillugu oqaatigissavara pissutsit allanngornikuummata. 2011-mi peqqinnissaqarfimmi aaqqissuusseqqinneq ingerlassimavarput, tamannalu ilaatigut atuutsinneqalerpoq nakorsanik atorfinitsisiniarnerup ajornartorsiutaanera kiisalu aamma immikkut ilisimasalinnik peqqissaasussarsiornerup ajornartorsiutaasimanera pissutigalugu. Tamatumani siunertaasimavoq nunap immikkoortuini tamani suliassaqarfiit iluini nukittuunik piginnaasaqartoqarnissaa, taamaalilluni qulakkeerniarneqarluni siunissamut isigaluta sulisussanik eqqortunik atorfinitsitsisinnaanissarput.”, taama oqarpoq Peqqissutsimut Naalakkersuisoq Agathe Fontain, nangillunilu:

-”Tamanna isumaqarpoq pilattaanerit pilertortut ullumikkut nunap immikkoortuini qitiusumik napparsimavinni imaluunniit Dronning Ingridip Napparsimavissuani ingerlanneqartarnerat, taakkunani sulisut pilattaasinnaasut eqqortumillu piginnaasallit atortullu eqqortut pigineqarmata. Matumani pineqarpoq siullerpaatillugu salliutinneqassasoq napparsimasut isumannaatsuunissaat. Tamannarpiarlu isumaqatiginniutigerusunngilarput.”

-“Peqqinnissaqarfinni periarfissat allatigut patajaallisarneqarnikuupput. Assersuutigalugu ultralydscanning-it siusinaartumik nappaammik suussusersiorneqarnissamut atorneqarsinnaasunik. Telemedin atorlugu immikkut ilisimasalinnik nakorsanik attaveqalersitsisinnaasunik, taamaasilluni napparsimasoq sukkanerusumik nalilersorneqarsinnaalluni piffissaagallartillugulu allamut nuutsinneqarsinnaalluni.”

-”Tamanna oqaatigeriarlugu Naalakkersuisut peqqinnissaqarfimmi aaqqissuusseqqinnerup nalilersorneqarnera aallartisarpai. Nalilersuinermit erserpat arlaatigut pitsaanerusumik sulisinnaasugut innuttaasut pitsaanerusumik sullinneqarnissaat anguniarlugu soorunalimi tamatuma misissorumaarparput,”. Peqqissutsimut Naalakkersuisoq Agathe Fontain oqarpoq.

Peqqinnissaqarfimmi aaqqissuusseqqinnermi ulloq 1. januar 2011 atuutsinneqalersumi pingaarnerpaatut siunertarineqarsimasoq tassaavoq peqqinnissaqarfiup piffissamut naleqquttumik sullissiinnarnissaa, najukkami innuttaasut peqqinnissakkut sullinneqarnerisa ukkatarineqarnissaat aammalu aningaasaqarnikkut, teknologiimik sulisoqarnikkullu nukinnik pitsaanerpaamik atuinissaq

Najukkani nunap immikkoortuani peqqinnissaqarfiup ilinnut neqeroorutai Peqqik.gl-mi atuakkit.


Sukumiinerusumik paasisaqarniaraanni naalakkersuisup allattaa Nauja Møller på mobil: +299 58 26 54 imaluunniit e-mail: nmoe@nanoq.gl atorlugit attavigineqarsinnaavoq