Aalisartut piniartullu ullorsiornissinni pilluaritsi

Aalisarnermut Piniarnermullu Naalakkersuisutut nuannaarutigalugulu tulluussimaarutigaara  ullorsiornissinnik pilluaqqusinnaagassi. Nunatsinni aalisartut piniartullu qangaaniilli ataqqillugillu nuannaartorisarivakka.

Aalisartut piniartullu, taakkulu ilaqutaasa ullorsiorneranni Naalakkersuisut sinnerlugit pilluaqquakka.

Maannamut Aalisarnermut Piniarnermullu sivikikkaluartumik Naalakkersuisoo-reerlunga qutsavigerusuppara KNAPK maannamut suleqatigiilluarnitsinnut.

Malugisinnaavara suleqatigiilluarnissamik piumassuseqartoqartoq. 

Nuna tamakkerlugu naalakkersuinermik 1995-imit qinikkatut sulilerninngaanniit pingaartittuarsimavara sullitama ajunnginnerpaamik atugassaqartitaanissaannut anguniagaqassallunga, tamannalu aamma Aalisarnermut Piniarnermut Naalakkersuisutut anguniassallugu piumassuseqarfigilluinnarpara. 

Nukikka tamaasa aalisartut piniartullu pitsaanerpaamik atugassaqarnissaannik Naalakkersuisutut sulissuteqassallunga erseqqissaassutigissavara.

Naalakkersuisut sulinitsinni Naalakkersuisooqatigiinnissamut isumaqatigiissut tunngavigalugu sulisussaavugut.

Naalakkersuisooqatigiinnissamut isumaqatigiissutit pingaarnersaasa ilaat tassaavoq aalisakkat tunisassiarineqarsinnaasut nutaat atorluarneqarnissaat, aammalu aalisarfiusinnaasuni nutaani misileraatitsilluni aalisartitsisoqartassalluni, taakkunanilu pisat nunatsinni suliarineqartussanngorlugit tulaanneqartarnissaat aqqutissiuunneqartassaaq.

Naalakkersuisooqatigiinissamut isumaqatigiissummi aamma erseqqissarneqarpoq Tunumi Tasiilap eqqaani Ittoqqortoormiunilu aalisarnermik inuussutissarsiuteqarneq immikkut pilersaarusiugaasumik siuarsarneqassasoq, aalisariuteqarnikkut tunitsiveqarnikkullu ineriartortitsiviusumik.

Kujataata kangerlui qangatut aalisagaqarpassuaqarunnaarput. Tamanna umiatsiaaqqamik inuussutissarsiortut aningaasarsiornermikkut malugisimasorujussuaat. Taamaattumik Naalakkersuisut aalisarnermik inuussutissarsiuteqartut peqatigalugit umiatsiaaqqanik aalisariutinillu aalisartut atugaat pitsaanerulersikkusullugit maannakkut suliniummik aallartitsissallutik pilersaaruteqarput.

Naalakkersuisooqatigiinnissami isumaqatigiissummi allat pingaarutillit oqaatiginngikkaluarlugit taamaattoq isumaqatigiissummi allassimasut timitalernissaasa sulissutiginissaat pillugit, kattuffiit qanimut peqatigalugit sulinissatsinnut, Naalakkersuisuni qilanaarpugut.

Aalisarnermut Piniarnermullu Naalakkersuisoq, Hans Enoksen

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaq, Jørgen Isak Olsen. Email: jio@nanoq.gl