LNS Greenland Gems A/S-ip Rubinisiorfissamut tunngatillugu IBA-mut Addendum atsiorpaa

Aappaluttumi Rubinisiorfissamut IBA allannguuteqarani LNS Greenland Gems A/S-imit ingerlateqqinneqassasoq, Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisup Vittus Qujaukitsoq-ip, LNS Greenland Gems A/S aamma Borgmesteri Asii Chemnitz Narup peqatigalugit ullumi atsiorpaa. 

Vittus Qujaukitsoq tassunga atatillugu oqarpoq. ”Aappaluttumi suliassamut siusinnerusukkut suliaqartuusimasoq suliassap ingerlanneqalernissaanik qulakkeerisussaammat Kalaallit Nunaanni nuannaarutissaavoq.  Taamaattumik LNS Greenland peqatigalugu suliassap inuussutissarsiornermi suliffissaqartitsiniarnermilu periarfissaqalersitsilluni, kiisalu ujaqqanik pinnersaasiassanik suliassaqarfiup aamma Kalaallit Nunaanni aatsitassarsiornermut suliassaqarfiup iluanni ilinniartitaanermut periarfissaqalersitsilluni, suliaqarnerup pitsaasup ingerlaqqissinnaanera neriulluarfigisorujussuuara. 

Kommuneqarfik Sermersuumi borgmesteri Asii Chemnitz Narup oqarpoq: ”Innuttaaqatinnut aammalu Kommuneqarfik Sermersuumi suliffeqarfinnut iluaqutaasumik rubinisiorfissamut tunngatillugu suleqatigiinnerup ingerlaqqinnissaa qilanaaraara. Suliffeqarfiit ingerlallualereersimasut najukkameersut, suliassap ingerlanneqalernissaanik qulakkeerisussaammata nuannaarutigisorujussuuara.    

Jens B. Frederiksen-ip, LNS Greenland-imi pisortamut tullersortaasup oqaatigaa, ilaatigut suliffissanik inuussutissarsiornermillu periarfissaqalerluni suliassap najukkami inissisimanera pilliutiginagu, ingerlatsinerup sapinngisamik piaarnerpaamik aallartinnissa LNS-ip siunnerfigigaa. 

Addendum tamakkiisunngorlugu atuarneqarsinnaavoq uani.

Annertunerusunik paasisaqarusunnermi attaveqarfissaq: 
Naalakkersuisup allattaa Helene S. Pedersen, Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoqarfik.

Email: hspe@nanoq.gl, oqarasuaat +299 34 56 06.