Illoqarfinni nunaqarfinnilu tamani eqqagassalerineq salliutinneqassaaq

Eqqagassalerinermik avatangiisinut peqqissutsimullu isumannaatsumik ingerlatsissaagut. Ajoraluartumik innuttaasut eqqagassalerineq akuersaarneqarsinnaanngitsoq pillugu kommuniminnut kinguneqanngitsumik suaartartoqarneranik pisoqaqqippoq. Maanna Aapilattumi innuttaasut nunaqarfimmi eqqagassalerinermi pissutsit akuersaarneqarsinnaanngitsut pillugit erseqqissaateqartuupput.

”Aappilattumi pissutsit pitsaannginnerat ilungersunarpoq. Tamanna iluarsineqassaaq. Nunatsinni isumannaatsumik eqqagassalerinissarput uannut pingaaruteqarpoq. Aappilattumi pissutsinut tunngatillugu suliaq pillugu nassuiaateqaqqullugu, kiisalu qaqugu qanorlu pissutsit iluarsiniarnerlugit pilersaarummik saqqummiusseqqullugu Qaasuitsup Kommunia attaveqarfigaara. Kommunip inatsisit, aammalu eqqagassalerinermik torersumik illersorneqarsinnaasumillu pilersitsinissamut piumasaqaatit MALITTUSSAAVAI.” Namminersornermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq. 

Eqqagassalerineq kommunit akisussaaffigaat. Naalakkersuisut eqqagassalerinermi suliassaminnut atatillugu kommuninut tapersersuerusupput ilitsersuerusullutillu.

Tassalu ukiuni kingullerni kommunit avatangiisinut suliassaqarfimmi suliassanut aalajangersimasunut tapiiffigineqarput, ilaatigut eqqaavissuarnik saliinernut. Aappilattoq nunaqarfinnut, eqqaavissuarnik saliiffissatut kommunimut aningaasaliiffiusunut ilaavoq.

Kiisalu kommunit kommunini eqqagassanut pilersaarusiornissamut tapiiffigineqarput. Eqqagassanut pilersaarutit ilaatigut innuttaasut, eqqagassanut pilersaarutit aalajangersimasut suut kommuniminni atuutsinneqarnersut takunnissinnaanissaannut atorneqartussaapput. Tamatuma peqatigisaanik suliassaqarfimmi kommunit anguniagaqarfiusumik siunissamullu ungasissumut suliniuteqarnissaannik qulakkeerisussaapput. Kommunit avatangiisinut suliassaqarfimmut inatsisinik malinnittussaapput, aammalu ammaannartumik ikuallaaneq inatsisinik ersarissumik unioqqutitsineruvoq. Ammaannartumik ikuallaaneq mingutsitsiviusarpoq, innuttaasullu peqqissusaannut ulorianarsinnaalluni.

Annertunerusumik paasissutissanik perusukkussi immikkoortortaqarfimmi pisortaq attavigineqarsinnaavoq Karen Anne Arleth email: knar@nanoq.gl imaluunniit oqarasuaat 345154