Qaqortumi mittarfiup inissiffissaani qaartitsineq siulleq

Qaqortumi qaartitsineq siulleq marlunngornermi 8. november 2016-imi pisoq, taannalu arfininngornermi 12-ani qaartitsinermik allamik malitseqartinneqassaaq.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Martha Lund Olsen tassunga atatillugu oqarpoq:

“Nuannaarutigalugu oqaatigisinnaavara Qaqortumi mittarfimmik qaartitinerit siulliit pissammata ulloq 8. november aamma ulloq 12. november, soorlu Qaqortumi innuttaasunik ataatsimiisitsininni nalunaarutigereeriga sapaatip akunnerup matuma siuliani.”

Qaartiterinerit mittarfissanut nutaanut misissueqqaarnerup ingerlaneranut pilersaarutaasumut ilaatinneqarput. Qaqortumi mittarfiup sananeqarneranut atatillugu qaqqamit 2 millioner m3-nik, ilaatigut mittarfissap immernissaanut qallernissaanullu atugassanik qaartiterisoqassasoq missiliorneqarpoq. Tassunga assersuutitut 1990-ikkut naaneranni mittarfiliornerit annersaat Maniitsumi ingerlanneqarmat taakku sisamararterutaat qaartiterlugit piiarneqarput.

Qaartiterinermi inissiffissap pitsaassusia misissuiffiginiarlugu qaqqamiit misissugassanik piiaanissaq siunertarineqarpoq, tamannalu taamak annertutigisumik sanaartornissamut pingaaruteqarpoq.

Namminersorlutik Oqartussat qaqqamiit misissugassanik, laboratoriami misissorneqartussanik piiaalluni qaartiterinissaq pillugu najukkami entreprenørimut isumaqatigiissuteqarput.

Qaqortumi, Nuummi Ilulissanilu mittarfiliornissanut misissueqqaarnerit Kalaallit Airports A/S-ip aamma Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiup qanittumik suleqatigiillutik ataqatigiissaassavaat.

 

Paasisaqarnerorusuttut attavigisinnaavaat Naalakkersuisumut allatsi Rebekka Kleemann, oqarasuaat +299 482223 imaluunniit e-mail rekl@nanoq.gl.