Savissimmi imigassamik nioqquteqartarnerup unitsinneqarnissaa Naalakkersuisut aqqutissiuuppaat

Savissivimmi innuttaasut amerlanerussuteqartut kissaatigaat nunaqarfimmi imigassanik aalakoornartulinnik tuniniaaneq tamaat matuneqassasoq. Naalakkersuisut nalunaarummik nutaamik akuersissuteqaqqammerput Savissivimmi imigassamik aalakoornartulimmik tuniniaaqqusaajunnaarnissaanik kissaateqarnermut naapertuuttumik.

Naalakkersuisut Qaasuitsup Kommuniani imigassanik aalakoornartortalinnik nioqquteqartarneq sassaallertarnerlu pillugit nalunaarut nutaaq akuersissutigeqqammerpaat. Nalunaarummi Qaanaami nunaqarfinnilu ukunani Qeqertat, Savissivik, Siorapaluk, Aappilattoq, Kangersuatsiaq, Kullorsuaq, Innaarsuit, Naajaat, Nuussuaq, Tasiusaq, Nutaarmiut aammalu Upernavik Kujallerni atuuttussamik nioqquteqartarneq sassaalliuteqartarnerlu malittarisassiuunneqarpoq.

Nalunaarut nutaaq Savissimmi imigassanik aalakoornartortalinnik nioqquteqartarnerata unitsinneqarneranik kinguneqartussaq ullumi novembarip arfineq aappaani atuutilissaaq. Qaanaami nunaqarfiinilu sinneruttuni nioqquteqartarnermut tunngatillugu malittarisassat allannguuteqaratik atuutiinnassapput.

”Nalaakkersuisut toqqarsimavaat nunaqarfimmi Savissivimmi imigassamik aalakoornartortalimmik nioqquteqartarnerup unitsinneqarnissaanik kissaateqarneq malissallugu. Imigassamik aalakoornartortalimmik nioqquteqartarnerup unitsinneqarnissaanik kissaateqarneq nunaqarfimmi meeqqat ilaqutariillu atugarissaarnerulernissaannik tunngaveqarpoq. Taamatut kissaateqarneq tapersiinnarsinnaavarput”, Peqqissutsimut Naalakkersuisoq Agathe Fontain oqarpoq.

2016-mi januaarip qaammataani Savissivimmi imigassamik aalakoornartortalimmik nioqquteqartarneq pillugu missingersuutitut atugassamik taasititsisoqarpoq. Amerlanerussuteqartut imigassamik aalakoornartortalimmik nioqquteqartarnerup matuneqarnissaanik taasisimapput.

Tamatuma kingorna Kommunalbestyrelsimit Naalakkersuisunut Savissivimmi imigassamik aalakoornartortalimmik nioqquteqartarneq inerteqqutaalissasoq inassuteqaatigineqarpoq.

Inassuteqaammi ilaatigut takuneqarsinnaavoq Savissivimmi piffissap ilaani annertuumik imigassartortoqartartoq ilisimaneqartoq, tamatumalu ajornartorsiutaanerata kingunerisarlugu meeqqat ukiukitsut angajoqqaaminnit sumiginnarneqarsinnaanerat.

Tamanna tunngavigalugu Peqqissutsimut Naalakkersuisoqarfiup Qaasuitsup Kommuniani imigassanik aalakoornartortalinnik nioqquteqartarneq sassaallertarnerlu pillugu nalunaarut nutaaq suliarisimavaa taannalu Naalakkersuisut akuersissutigeqqammerpaat

Annertunerusumik paasissutissat pissarsiarineqarsinnaapput naalakkersuisup allattaa Nauja Møller mobil: +299 58 26 54 imaluunniit e-mail: nmoe@nanoq.gl atorlugit attavigineqarsinnaavoq.