Isumaginnittoqarnikkut suleqatigiinneq pitsanngorsarneqassaaq

Kalaallit Nunaata Danmarkillu akornani isumaginnittoqarnikkut suliassaqarfiup suleqatigiissutigineqarnera nukittorsarneqassaaq

Danmarkimi tapiissutaasartut satspuljet pillugit isumaqatiginninniarnerit naammassineqaqqammerput tamatumani piffissami ukioq 2017-2020-mut aningaasaliissutissat katillugit 10 mio. kr.-it meeqqat inuusuttullu sumiginnarneqarsimasunut atugassarititaasunik pitsanngorsaanissanut Namminersorlutik Oqartussani sulianut nukittorsaanissamut atugassiaallutik.

10 mio kr.-it toqqaannartumik Nunatta aningaasanut inatsisaanut illikartinneqartussaanngillat. Pulje pineqartoq aningaasaliissutillu suleqatigiinnerulernissamut kiisalu Namminersorlutik Oqartussat suliassanik immikkut ilisimasaqarfiusunik pisariaqartunik inerisaaqqinnissani atugassiaapput ilaatigut meeqqat inuusuttullu pillugit inunnik sullissinissani nutaanik periusissanik inerisaanissani atugassiaallutik. 

Isumaginninnermut, Ilaqutariinnermut Naligiisitaanermut Inatsisinillu Atortitsinermik Naalakkersuisoq Sara Olsvig oqarpoq:

”Isumaginninninnikkut suliassatigut suleqatigiinnissaq pingaartippara. Naalakkersuisuni isumaginninneq suliassat pingaarnersaattut ilaattut inissisimatipparput. Inuiaqatigiit nukittuut pilersinniarnerini ilaqutariit sanngisuut pisariaqartippavut. Danmarkimik suleqateqarneq innuttaasut Nunarput qimallugu nuuttartut ikilinissaannut meeqqanullu inuusuttunullu Nunatsinni atukkatigut pitsanngorsaanermut iluaqutaassaaq.

Tapiissutigineqartartut suliniutinullu aningaasaliissut Namminersorlutik Oqartussat meeqqat inuusuttullu pillugit suliniuteqarnerini ukiorpaalunni suleqatigiiffigineqarsimanerisa kingunerisut isigineqassapput. Danmarkimik suleqateqarnerput tamakkiisumik isigalugu isumaginnittoqarfimmut tunngasuni suliassat pillugit suleqatigiinnerup annertusarneqarnissaa Kalaallit Nunaata kissaatigigaa ersarsissumik oqariartuutigivarput suleqatigiinnerlu tamanna ukiuni tulliuttuni ilaqutariinnut meeqqanullu iliuuseqarnerusinnaanissatsinnik kinguneqassaaq

Nuannaarutigaarattaaq satspuljep isumaqatiginninniutigineqarnerani kalaallit Danmarkimi najugallit inuuniarnermikkut atugarliortut pillugit suliniutinut aamma illuartitsitsilluartoqarmat”

Satspuljep isumaqatigiissutigineqarnerani 10 mio. kr. taaneqartut saniasigut 36,4 mio. kr. kalaallinut atugarliortunut Danmarkimi najugalinnut iliuusissanut qulakkeeneqarsimapput.

Annertunerusumik paasisaqarusukkaanni attavissaq: Naalakkersuisup allattaa Sina Møller Kristiansen, oqarasuaat: 346949 imaluunniit e-mailikkut: NIMK@nanoq.gl