Qujauktsoq inuussutissarsiutinik Kinami nittarsaassinermi

Ulluni 31. oktobarimit 6. novembarip tungaanut Inuussutissarsiornermut, Suliffeqarnermut, Nukissiuuteqarnermut Nunanullu allanut Naalakkersuisoq Vittus Qujaukitsoq siuttoralugu nunatsinnit aallartitat Kinamut tikeraarput.

Tikeraarnermut siunertaq tassaavoq nunatsinnit nioqqutissiassat, soorlu puisit amii aamma aalisakkat tunisassiarineqartut pilerisaarutigineri. Tamakku saniatigut ingerlatseqatigiiffinnik, ilaatigut aatsitassarsiornermut suliassaqarfinnik, takornariarnermi suliffeqarfinnik aammalu aningaasaliinissamut aningaaserivinnik atassuteqartunik arlalinnik ataatsimeeqateqartoqassaaq.

Marlunngornermi 2. novembarimi Vittus Qujaukitsup illoqarfimmi Rinzaomi suliffissuaq, Royal Greenlandimik suleqateqartoq tikeraarpaa. Tikeraarnermi nunatsinnit aalisakkanik qalerualinnillu, ilaatigut qaleralinnik, kinguppannik saattuanillu suliaqartarnerinik saqqummiussisoqarpoq. Tassunga atatillugu Vittus Qujaukitsoq erseqqissaavoq; ”allaanerusumik assullu kusanartumik ilusilimmik nunatsinnit nioqqutissiassat qanoq suliarineqarlutillu Kinami niuerfigisanut siammartitertarnerat ilinniagaqarfiuvoq”.

Ulloq taanna kingusinnerusukkut aallartitat illoqarfimmi Qingdaomi pisoqarfimmi peqataapput, tassani Kinalu niueqatigiinnerminnik ukiut 20-nngortorsiornertik Royal Greenlandip aamma Polar Seafoodip malunnartippaat. Pisoqarfiusumi Vittus Qujaukitsoq qaaqqusisuuvoq, tassani nunatta imartaanit tunisassiarineqartut Royal Greenlandimit, Polar Seafood Greenlandimit, North Atlantic Seafoodimit, Arctic Prime Fischeriesimit Iceberg Seafoodimillu tunissutaasut kusanartumik sassaalliutigineqarlutik.

Sapaatip akunnerani kingusinnerusukkut illoqarfimmi Chongqingimi Food & Fashionimi takutitsinermi Great Greenland peqatigalugu puisit amiinik tunisassianik pilerisaariniarluni peqataasoqassaaq. Aallartitat arfininngorpat angerlamut utissapput.

Assit