Avatangiisinut Pinngortitamullu Nersornaat

Ukioq manna Avatangiisinut Pinngortitamullu Nersornaammut piukkussannik innersuussisinnaalerputit

Ukioq manna Namminersorlutik Oqartussat Avatangiisinut Pinngortitamullu Nersornaasiuttagaannut piukkussanik nassaarniarnissamut piffissanngoqqippoq.

”Ukioq 2016 meeqqat ukioraat, taamaattumillu ukioq manna avatangiisinut pinngortitamullu nersornaasiinissami meeqqat immikkut isiginiarneqassapput. Meerartatta siunissami avatangiisivut minguitsut pinngortitarlu alianaatsoq, kinaassutsitsinnut pingaaruteqartorujussuaq isumagisussaavaat, taamaattumillu ukioq manna nersornaasiinermi suliniutit, meerartatta Kalaallit Nunaanni pinngortitaq avatangiisillu pillugit ilisimasaannik tunniusimanerinillu siuarsaasut nersorusuppakka, Namminersornermut, Pinngortitamut, Avatangiisinut Nunalerinermullu Naalakkersuisoq, Suka K. Frederiksen oqarpoq. 

Taamaattumik ukioq manna avatangiisinut pinngortitamullu nersornaat inummut, sullissivimmut suliniaqatigiiffimmulluunniit, meeqqat pinngortitaq avatangiisillu pillugit ilisimasaannik qaffatsitsiniarluni immikkut ittumik suliniuteqartumut tunniunneqassaaq.

Nersornaasiinissamut innersuussissaguit qanoq iliussavit?

Ukioq manna avatangiisinut pinngortitamullu nersornaasiuttakkamut piukkussat 30. november 2016 ilanngullugu innersuunneqarsinnaapput. Innersuussut naatsumik tunngavilersuutitaqassaaq, kiisalu inunnut innersuussummik nassiussisunut attaveqarfissanut paasissutissanik imaqassalluni. Innersuussut Namminersornermut, Pinngortitamut, Avatangiisinut Nunalerinermullu Naalakkersuisoqarfimmut pann@nanoq.gl  aqqutigalugu imaluunniit najukkamut uunga nassiunneqassaaq: Namminersornermut, Pinngortitamut, Avatangiisinut Nunalerinermullu Naalakkersuisoqarfik, postboks 1614, 3900 Nuuk, nalunaaqutserlugu: Namminersorlutik Oqartussat Avatangiisinut Pinngortitamullu Nersornaasiuttagaat.

Tunuliaqutaq

2004-mi Naalakkersuisut aalajangiipput, ukiumoortumik avatangiisinut pinngortitamullu nersornaasiisoqartalissasoq. 2015-imi atuartut suliniutaat siunnerfigineqarput, tassanilu Namminersorlutik Oqartussat Avatangiisinut Pinngortitamullu Nersornaasiuttagaat Qaanaami Avanersuup Atuarfianut aamma Nuummi Atuarfik Hans Lyngemi 9.A-nut tunniunneqarpoq.