Angajoqqaat sammineqarnerussapput

Ilaqutariinnermut, Naligiissitaanermut, Isumaginninnermut Inatsisinullu Atuutsitsinermut   Naalakkersuisoq Sara Olsvig ullumi Naalakkersuisutut suliffimmini siulliit ilaanni Meeqqat Inuusuttullu oqaaseqartartuat MIO ataatsimeeqatigaa.

Naalakkersuisooqatigiinnissamut isumaqatigiissummi allaqqasutut MIO-p nukittorsarneqarnissaa ukiuni tulliuttuni Sara Olsvig-p naalakkersuisutut suliariniagaasa ilaannut ilaavoq.

”MIO inuiaqatitsinni suliassamik pingaaruteqarluinnartumik kivitaqarpoq. Meeqqat oqaaseqartartuat MIO-lu pisariaqavissimasoq paasinarsisimavoq. Taamaammat MIO-p ilisimasat katersaasa pigiuaannalernissaat nunatsinnilu angalanissaminnut, meeqqanik, angajoqqaanik, atuarfeqarfinnik allanillu sullissisunik tamanik toqqaannartumik naapitaqartarnissaannut periarfissaqartuarnissaat qulakkeertariaqarpoq. 

MIO-p tunuarsimaanani suleriaaseqarnera assut nersugassatut isigaara. Ajornartorsiutit suuneri paasisariaqarpavut eqqortumik iliuuseqarfigisinnaajumallugit. Piffissami aggersumi angajoqqaajuneq angajoqqaallu atugaat annertunerusumik naalakkersuisutut sulininni sammitikkumavara ilanngullugittaaq inunnik isumaginninnermi sullissisut atugaannik qaffaanissaq suliniutigissallugu. Meeqqanut toqqaannartumik attuumassuteqartut assaat kialaartut aamma nukittuujunissaat qulakkiissavarput, inersimasut pineqartut isumaginninnikkut kivitsilluarnerusinnaanissaat qulakkeerumallugu”, Sara Olsvig oqarpoq. 

Naalakkersuisooqatigiinnissamik isumaqatigiissutip nutaap soorlu ersersikkaattaaq MIO nukittorsarneqassaaq kiisalu nuna tamakkerlugu meeqqanut inuusuttunullu suliniutissat pillugit iliuusissatut pilersaarusiornissat Sara Olsvig Naalakkersuisutut suliassat ilaattut piviusunngortissavai.

”Nuannaarutigeqaara siunissamut ungasissumut nunalu tamakkerlugu ataatsimoortumik periuseqarluni meeqqanut atugassarititaasut pillugit iliuusissatut pilersaarummik peqalertussanngoratta. Minnerunngitsumik isumaqarpunga meeqqat tusaaneqarnerulersut angalasarninnimi inuiaqatigiinni tamani sumiluunniit suliassarujussuaq tulliullugu aallunneqartariaqartoq ilisimavara. Sara Olsvig isumaqatigivarput nunatsinni meeqqat pillugit inersimasut ataatsimoorfiusunik takorluugaqarlutik aammalu naleqartitat kiisalu iliuusissanik siunnerfinnik qimoriarfissaqartariaqartut tamatumani meeqqat toqqissisimasumik meeraanermik inuuneqarnissaanik qulakkeerinninnissani” Meeqqat illersuisuat Aviâja E. Lynge oqarpoq. 

Annertunerusumik paasisaqarusukkaanni uunga attaveqartoqarsinnaavoq:

Naalakkersuisup allattaa Sina Møller Kristiansen, oqarasuaat 346949 imaluunniit e-mailikkut nimk@nanoq.gl