Avannaamioqatigiit kulturikkut pikialaartitsinerat Londonimi aallartissaaq

Nipilersorneq, qitinneq, isiginnaartitsineq, atuakkiat, ilusilersuineq, assilissanik eqqumiit-suliat, oqalugiarnerit oqallinnerillu kiisalu atisat mutit nerisassiallu pilersaarutinut ilaassapput sapaatip-akunnerani uani Southbank Centre-mi saqqummiunneqarpat Nordic Matters 2017-imi ilaatigut susoqarumaarnersoq. Kulturikkut pikialaartitsinissarsuaq taanna Londonimi januaarip 13-iani 14-ianilu ammarneqassaaq.

Kulturimut naalakkersuisoq Doris Jakobsen ammaanermi peqataassamaarpoq ministerit allat nunanit avannarlerneersut Tuluit Nunaanneersullu ilagalugit.

Doris Jakobsen oqarpoq:

”Ukiuni arlalinni politikkikkut sulinermi siunertaavoq nunatsinni eqqumiitsuliornermik kulturimillu suliaqartut nunarsuarmi annertunerusumik periarfissaqarnerulernissaat aammalu saqqummilaarnerulernissaat. Nuannaarutigaara eqqumiitsuliortut nunatsinneersut taamatut nunani tamalaani saqqummernissaminnut maanna periarfissaqalermata. Kalaallit atuakkiortut eqqumiitsuliortullu allat saqqumilaartinneqarnerunissaat pisariaqarpoq. Siusinnerusukkut Nunat avannarliit suleqatigiinnerannut naalakkersuisutut maannalu kulturimut naalakkersuisutut nuannaarutigaara Nordic Matters-ip Londonimi januaarimi 2017-imi ammarneqarnissaanut peqataasussanngornera. Avannaamioqatigiit taamatut kulturikkut pikialaartitsinissaannut aamma kalaallinik peqataasussanik qaaqqusisoqarnera takullugu nuannerpoq. Neriuppunga 2017-ip ingerlanerani Southbank Centre-mi pisussat avannaamioqatigiinni eqqumiitsuliortunut pikkorissorpassuarnut periarfissanik nutaanik ammaassiumaartut.”

Kalaallit peqataasussatut programmimi allassimasut tassaagallarput atuakkiortut Sørine Steenholdt aamma Bolatta Silis Høegh, festivalinut marlunnut qaaqqusaasimasut. Kalaallit eqqumiitsuliortut peqataasussat allat aqqi kingusinnerusukkut saqqummiunneqarumaarput.

Pisussat allattorsimaffiat suli naammassineqanngilaq, qaammatini aggersuni iluarsine-qartartussaalluni. Southbank Centre pillugu paasissutissanik uani atuagassaqarpoq: http://cms.southbankcentre.co.uk/sites/default/files/press_releases/final_nordic_matters_2017_announcement_02.11.16.pdf

Nordic Matters pillugu
2015-imi oktobarimi avannaamioqatigiit kulturimut ministerii aalajangerput Londonimi Southbank Centre nunani tamalaani qinnuteqartut akornanni qinerniarlugu avannaa-mioqatigiit eqqumiitsuliornikkut kulturikkullu iliuuseqaqatigiinnissaannut nutaamut qitiusussatut. Tassani Nordic Matters eqqumiitsuliornikkut kulturikkullu ukioq naallugu pikialaartitsiviussaaq. 2017-imi pisussani nunanut avannarlernut tunngatillugit pingaartitat pingasuuniarput: Pinnguaatit, imminut napatissinnaaneq aamma naligiissitaaneq.
Nordic Matters pillugu paasisaqarnerorusukkuit una tooruk: http://www.southbankcentre.co.uk/whatson/festivals-series/nordic-matters

Paasiniaavigineqarsinnaasoq Pia Lynge (Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik) Toqq: +299 345706 PILY@nanoq.gl